16 ديسمبر 2006

الجمل والراعي اللئيم

تدق رأسي وتؤرقني منذ سنوات طويله جملة من الأسئلة الحائرة عن مصر وشعبها .. هل هو تعيس حقاً كما نراه أم أعيننا تكذب علينا ؟ هل ما نقرأ من إحصائيات فظيعة حول معدلات البطالة والأمراض الخطيرة التي تنهش كبد وكلاوي وكل جسد المصري حقيقية أم افتراء على الحاكم اللذيذ ؟ هل ضياع ثروات مصر منذ السبعينات وحتى اليوم حقيقة أم وهم ؟ كيف اضمحل إنتاج مصر من القطن طويل التيلة الأول عالمياً من 12 مليون طن إلى أربعه فقط ؟ كيف بيع القطاع العام بالكامل تقريباً وأين ثمنه ؟ كيف بات المصري أرخص كائن بشري على وجه الأرض ؟ هل هذا معقول ؟ هل يمكن أن نصدق هذا كله ونصدق معه أن الشعب مازال لا يحرك ساكنا ولا يسكن متحركاً ؟ ما هذا الشعب المصري ؟ كيف هو ؟ كيف يفكر ؟ لماذا هو صامت ؟ هل هو جبان إلى هذا الحد ؟

لا أبتعد كثيرا عن الحقيقة لو قلت أنني قرأت كثيراً في علوم الاجتماع من مقدمته مؤسسه إبن خلدون مروراً بجمال حمدان (أوصف واحد وصف مصر مؤخراً) حتى آخر طالب في قسم اجتماع - جامعة الغلابه المضروبين بالسنج والشوم ومحاصرين ببلطجية الحزن الوطني .. ليس كل ما كتب بالطبع ولكن معظم ما يخصنا في مصر المحروسه (مش عارف فين الحراسه دي؟!) ، لأني أريد أن أفهم الشخصية المصرية .. ولماذا هي صامتة رغم كل ما تعانيه من ظلم وقهر وتجويع وإهدار للكرامة !!! وطبعاً كل ذلك كان مصحوباً بوقفات عند تاريخنا القديم والحديث ..

لقد توصلت إلى حقيقة بسيط جداً .. وجدت أن المصري كان على مر التاريخ عبارة عن شخصية جملي يتحمل الأهوال من جوع وعطش وضرب وإهانة .. ويخزن كل ذلك في داخل نفسه الأوسع من مساحة مصر ذاتها .. لكنه لم يكن يوماً حمار .. لو ذهبت إلى أي غيط في أقاصي الصعيد .. هناك عند أي فلاح بسيط سوف تتأكد من صدق هذا الكلام ، ستعرف أن هذه الشخصية الجملي هي سر استهبال واستعباط أي حصاوي حكم البلد دي وافتكر إنه بيحكم قبيلة من الحمير .. زي الحصاوي الحالي أو اللي عامل علينا حصاوي وهو لئيم قذر ماسوني ((أقصد مبارك الواطي طبعا)) .. لما يبص يلاقي نفسه بيلعب بالبلد كأنها فيديو جيم ولا حد يقوله بم .. هذه الشخصية الجملي التي يفهمونها خطأ هي في رأيي أحد أهم أسباب استفحال الطاغوتية والفرعنة لدى الحاكم في مصر بأمر بوش أو الشيطان (مش فارقه).. لكن هذا الجمل الصبور .. حمال المآسي والأهوال لا ينسى مظلمته مهما ضحك عليه الراعي بحزمة برسيم .. سيجد فرصته المواتية وينقض على الراعي الأحمق ليقضم رقبته .. فما بالك بأن الراعي الواطي مازال يحمل الجمل أكثر مما يطيق ولا يضحك عليه حتى بعود برسيم واحد ؟

هذا الشعب الجملي صبر كثيراً وتحمل وصبر وتحمل .. وأهين في عصور غبراء غابرة كثيرة .. شال هموم وبلاوي الحكام اللي حكموه وهربوا لما دمروا البلد .. وده اللي راح يعمله بالظبط مبارك الواطي وعيلته القذره وعصاباته لما بني صهيون يحبوا يوسعوا حدود دولتهم المزعومه ، اللي لغاية النهارده مش عايزين يعملولها حدود في استنظار استكمال شراء نصف مصر ((هم دلوقتي شاريين يجي ربعها .. مصانع ، شركات ، أراضي ، مطارات ، شواطيء ، عزب ، شوارع .. وبيوت وسكانها )) وطبعاً كالعاده اللي راح يشيل بلاوي مبارك الواطي وعصاباته .. ويقف لبني صهيون ويضحي بدمه هو الشعب الجملي ده .. لكن يا ترى لازم ننتظر لما ييجي اليوم القيبح ده ؟؟؟ يعني نسيب العميل يبهدل في البلد دي ونقعد ساكتين كده ؟؟؟ طبعاً لأ .. وهو ده اللي حيعمله الشعب الصبور الطيب المسكين ده لو حسبها صح .. يعني جوعه بجوعه .. وبهدله ببهدله .. وقلة كرامه بقلة كرامه .. يعني من آخر الآخر هي موته ولا أكتر؟ حين تأتي هذه اللحظة الجملية العبقرية المناسبة التي لم يعد لدى هذا الشعب ما يخاف عليه أو منه سينتفض بعنف لا يتصوره عقل الراعي الئيم ومن معه ...

هناك 37 تعليقًا:

سندباد مصري يقول...

لا تدل قرائه التاريخ المصري إلا علي شيء من الشجن والحزن علي أهلها الذين هم غالبا طيبون

تحياتي

موضوع محكم

والسلام

محمود سعيد يقول...

ليحذر الراعى من الجمل ، فالجمل قوى الصبر والعزيمة ، وإذا فاض به الكيل فقد يقتل صاحبه

yasser يقول...

اعتقد ان الجمل اللي بتحكي عنه
غالبا مات
دة لو كان اساسا موجود
الشعب دة لاجمل ولا حتي حصل قطة
احنا شعب نعاج
يساق بالعصا
ودة سر عبقريتنا
وسر عبقرية اللي بيحكمنا انه فاهمنا
وفاهم طبيعتنا
عاش الملك مات الملك
ونسقف
وهو دة اللي احنا بنعمله
وهنفضل نعمله
وهنربي عليه ولادنا
حتي حركة شباب الاخوان بجامعه الازهر
وجدت من يقف من النعاج ويطالب بتبرير واعتذار
؟!!!!!!!
اعتذار؟؟؟؟؟؟
لماذا الاعتذار
دي الحركة الوحيدة اللي ممكن نقول انها عملت كرامة للمصري وححسسته انه مش جبان
وممكن يقف في وجة الظلم
الحركة اللي النعاج مستنياها من 25سنة
نجد من يعارضها ويقول ليس هكذا نعارض
وليس هكذا نعبر عن رفضنا
طب ازاي يا نعاج البشر
؟؟؟؟؟؟؟؟؟؟؟؟؟؟؟؟؟؟؟؟؟؟؟
ازاي
؟؟؟؟؟؟؟؟؟؟؟؟؟؟
لا اصلنا كدة داخلين علي حرب اهليه
!!!!!!!!!!!!!!!!!
طب كله علي الله
ويرزقك يا مصر بحرب اهليه فعلا تقلع الاخضر قبل اليابس
بس برضة ازاي
احنا مينفعش عندنا حرب اهليه
لاننا برضة نعاج
هنخاف من بعض
ونخاف نموت
ونخاف اساسا اننا ندخل في مشاكل
ليه؟؟؟؟؟؟؟؟؟
عشان ثقافة القطيع
اعتقد
ان الحل من عند الله
الهي يعني
وان مكنش كدة
الوضع لن يبقي علي ماهو عليه
بل اسوء واسوء
ولا عزاء للنعاج

IBN BAHYA يقول...

شكرا لكم جميعا على تشريفكم وتعليقاتكم المحترمه ..

سندباد مصري
شكرا لك كثيراً وشكراً على رأيك في طيبة الشعب المصري الذي يصنع نوعاً من التوازن مع رأي أانا العزيز ياسر .. تحياتي لك
***********
أخي محمود سعيد
طبعاً كلامك صحيح .. بس مش عايزين نحذر الراعي اللئيم لأنه أعمى وأطرش وجشع ولازم يغور يتدهول على عينه في الحفرة ويطب ساكت قريبا بإذن الله .. تحياتي لك..
**********
أما أنت يا ياسر
تعبتني يا ياسر .. حرام عليك يا عمونا .. أنا برضه نعجه ؟ وحضرتك نعجه ؟ وكل الناس المحترمه هنا نعاج ؟ لأ يا ياسر .. أنا مقدر طبعاً حالة القرف والملل والغلب التي نحياها جميعنا .. طبعاً كلنا زيك وبيطلع مننا أكتر من كلامك ده بس خلينا شويه نعمل عليك دور الواعي الرزين .. جاتنا ستين نيله كلنا .. كلامك قريب برضه من كلامي .. أهو كله بيرعى وله راعي لئيم .. بس يا أخي تاريخ مصر مليان جمال كتير وياما رفصوا وعضوا الراعي اللئيم .. ما تستعجلش .. الهبشه جايه جايه ..

تحياتي للجميع

الزعيـمة يقول...

الشعب كان جمل يمكن
بس الوقتي باة نعجة

شعب مين الي الحاكم يخاف منة
مع احترامي للبعض القليل
البلد دي مفيهاش رجالة

ولا فيها ستات حتي احنا ملناش نوع
الرجالة لبسوا طرح والستات لبسوا ملس
واليتكلم يباه كافر واليسكت يباة موالي

ممكن اسمع اغنية الست دي امي ؟
اهديها لكل رجالة مصر

عنتر مش لاقي سيفه يقول...

السلام عليكم و رحمة الله و بركانه

الي كل المعلقين الافاضل و قبلهم استاذنا الكبير

ما اعمق هذا التشبيه الذي ابديته في مقالتك..و التعليقات كلها في محلها و لو ان تعليق السيد ياسر به قسوة بعض الشيء علي الانسان المصري...صحيح ان من اخطر عيوبه الخوف..لان معظمنا تربي عليه منذ الصغر...نخاف الاب ثم الاخ الاكبر ثم زميل الدراسة القوي ثم فتوة الحتة ثم العسكري فالظابط و اخيرا نخاف نتكلم حتي مع بعض..اذا فالخوف عادة تعودنا عليها ...اذا فهو ليس طبع في الشعب..اذا ممكن معالجته و ازالته كاي مرض خبيث من الامراض التي يعانيها الشعب

سكوت الشعب مثل سكوت الجمل...بسبب الصبر و انتظار الفرج من عند الله..شعب صحيح بيعشق التوكل علي الله...ليس خطا و لكن المفروض ان يعقلها ثم يتوكل..اذا ما ينقصنا هو ان نعقلها اولا...اي انه لابد من وجود من يفكر للشعب من ابنائه..لا تطلب من الشعب كله ان يفكر و يقرر و ينفذ..و لكن لابد ان يتم انتقاء من يفكرون منه للمراكز الهامة و القيادية ثم نطلب من الشعب ان يتوحد و يسير خلف هؤلاء

سيتحرك الشعب المصري قريبا جدا ان شاء الله و سيثور ليس كالجمل و لكن كالبركان الذي لن يستطيع احد ان يقف امامه الا كل هالك و ذو عقلية غبية

لسنا كالنعاج و تاريخنا شاهد علي ذلك..اعلم انه من الخطا الاستشهاد فقط بالتاريخ و لكن يجبب تكرار ما حدث سابقا من استفاقة

رب نازلة ضاق بها الصدر زرعا
و عند الله منها المخرج
ضاقت فلما اختنقت حلاقتها فرجت
و كنت اظن الا تفرج

(مع العلم اني متأكد انها ستفرج)

مذكرات حاحا مصر يقول...

عزيزي ابن بهية اتفق معك ان شعب مصر شعب طيب وحمول ولكنه ليس كالجمل لان غضب الجمل لا يتحمله احد ويكون شديد ولكن الشعب المصري شعب ضعيف تعود علي المهانة من قديم الزمان واصبح بلا ثمن في بقاع العالم ولم ولن يتحرك الا فقط لو زاد ثمن رغيف العيش كما حدث في السبعينات من القرن الماضي ولكن ربما من كثرة الظلم يتغير هذا الشعب الذي يأس منه كل زعمائه ويارب يفوق ويحس انه ولا عايش ولا ميت ولكنه في غيبوبة ولكنها طويلة طالت جداوانه ماشي زي ما قال عادل امام في النوم فى العسل .. شي حاي... شي... حاي . وياريت تزور مدونتي لاني كتبت ايضا عن هذا الموضوعمنذ يومينا تورد خواطر يعني ويبدو ان الشعب المصري وانطباعه اصبح مشكلة واضحة وضوح الشمس يحتاج الي الدراسة والتقييم ويارب يصحي والامل ان شاء الله في الجيل الجديد جيل المستقبل ومصر الحرة ولاد بهية

آدم يقول...

لاادري ماقول لك ياصديقي؛ تشبيهك اتمنى ان يكون صحيحا؛ لان صبر الجمل ايضا له حدود؛ في مصر حال جملكم افضل بكثير من حال الجمل التونسي؛ و انا هنا متفائل جدا عندما اشبه الشعب التونسي بالجمل؛ لكن بصفة عامة اعتقد ان الامور بدأت تتغير و لن تستطيع هذه الانظمة الصمود اكثر؛ مانقوم به نحن المدونين احد اشارات هذا التغيير؛ الذي و ان كان بطيئا الا انه قادم لا محالة

micheal mohsen يقول...

الجميع ينتظر لحظة انتفاضة الجمل و انقضاء صبرة و لكن السؤال هو متي تأتي اللحظة و هل سيكون دورنا مجرد الانتظار و تخمين من الذي سيطلق ثورة الجمل؟

واحد من الناس يقول...

المشكله ان الجمل نائم وصاحب المزرعه يعطيه كل يوم حقنه من المنوم واسع المدى طويل المفعول
كما انه يحمي المزرعه بالكلاب والذئاب و الثعابين
فكل من تسول له نفسه بمحاولة ايقاظ الجمل اما ان تأكله الكلاب او تلدغه الثعابين
فما الحل يا بطل
كيف الدخول للمزرعه
كيف نوقظ الجمل

أبناء ناصر يقول...

هاهاها جمل ولا خروف لازم تفكر شعبنا ده ايه نظامه و انا بدعوا كل الناس انها متقرأش تاريخ "الشعب المصري" لانه لا فخر فيه بدا من الفراعنه والهكسوس و البطالمه والرومان و القتح الاسلامي و الاستعمار سواء الانجيلزي او الاسرائيلئ او الحزب الوطني حاليا و اسال اي مصري عن اي حاجه اجابته ستكون "يا عم وانا والي " وعلي رأي سعد زغلول (مافيش فايد) لكن المره دي في الخروف ,,قصدي الجمل و اشك انه حصل جمل.......أبناء ناصر

IBN BAHYA يقول...

الإخوة الأعزاء .. شكراً جزيلاً على زيارتكم الموقرة ومشاركاتكم المحترمة ..

أختنا العزيزة الزعيمة .. كلامك رغم شدته إلا أنه يقترب ليقبل الحقيقة ثم يتنافر معها ويهرب بعيداً عند الجمل .. وهي دي طبيعة شعبنا يا زعيمه .. إحنا تلاقينا كده هاديين .. غلابه .. مستكينين خالص .. بس لما الجمل يوصل لمرحلة معينه بيفيض بيه ويعملها وياكل رقبة الراعي اللئيم .. عموما أنا مقدر شعورك وأحترم وجهة نظرك

أخي العزيز عنتر لاقي سيفه بإذن الله .. شكراً .. وأضيف على كلامك الهايل ده لتأكيده إننا بنخوف ولادنا بالعسكري .. شفت حد في الدنيا بيعمل كده ؟؟؟ واحد صاحبي كان معاه طفله الصغير في السيارة والولد بيعمل دوشه فقاله أسكت يا بابا العسكري هناك أهو .. ياه على الحلاوة .. طبعا لأن صاحبنا في روعه الداخلي وقاع جمجمة عقله الباطن بيخاف من العسكري ودهر برضه من رواسب حكم مبارك الواطي وربع قرن طواريء جعلت من العسكري عدو للمواطن وليس حارساً له .. كلامك صحيح .. تعرف إيه اللي بيعجبني في الإخوان المسلمين أوي أوي .. هي فكرة القاعده وتربية النشئ تربية صحيحة ومنهم سيأتي المجتمع الصحيح طبعاً وده جوهر فكر الإخوان وليس كما يدعي أصحاب دكاكين بيع الوطن الإعلامية .. ويكرمنا بمن تقول عنهم من مثقفين أحرار من كل القيود الأيديولوجية والحكومية ولقمة العيش التي تتطور لتصبح جاتوه في الغالب طالما فضلم مادين إيديهم للحكومة كي تطعمهم .. بيعجبني أوي واحد مفكر شاب حر اسمه خالد رشوان (يا رب يكون الإسم صحيح) بيعمل في مركز الأهرام للدراسات .. هذا وأمثاله من شباب بهيه هم من يجب أن يقودوا حركات التحرر الوطنية برؤية واضحه وعميقه مش هبلولا اليسار واليمين والخبل اللي داير حوالينا ده .. يالا ربك يعدلها يا أستاذنا الفاضل عنتر .. على فكره أنا متأكد زيك أنها لازم تفرج بإذن الله قريباً وقريباً جدا جدا ..

أخي العزيز .. مذكرات حاحا مصر ..
كلامك صحيح برضه .. ولست أنا وحدي ولكننا جميعاً معك فيما قلت ، لكني أختلف في نقطة هامة جداً .. لو كلنا بنقول كده .. طيب مين هو الشعب الوحش ده اللي بنشتم فيه ؟؟؟ أنا مين ؟ منين ؟ فين ؟ الله .. دا أنا من هنا برضه .. ياه .. يبقى أنا برضه خروف .. شفت بقى الحدوته بدايتها فين .. هنا .. من عندك انته .. وعندي أنا .. لو كلنا بنشتم ونقول عننا إننا خرفان ونعاج .. طيب لغاية إمته هنفضل كده ؟؟ إمته نغير الحالة النعاجية التي نحن عليها لو كلنا عارفين كده ؟؟؟ وأما حكاية أن المصري بقى رخيص جداً خارج بلده .. وحياتك ده عشان حكومته رخصت سعره خالص داخل بلده فبقى سلعه رخيصه خالص بره وفي أي مكان .. ده شيء عادي جداً .. أنا من صغري باحب أقعد مع الكبار من أجدادنا وأعمامنا .. أذكر أنني في طفولتي كنت أداوم على قضاء ساعتين أو ثلاث بصحبة اثنين من أعمامي الكبار (قريبون من عمر جدي) كل يوم بعد صلاة العصر يتمشوا ساعتين تلاته وألزق فيهم .. المهم كنا بنسمع عن المصري ده ياما كان وكان .. بس ده لما كان في مصر قياده حقيقيه وطنيه .. لكن دلوقتي الأبعد مبارك الواطي شغال على الناحيتين تقزيم وتلطيش في المصري في الداخل والخارج .. في الداخل قانون طواريء وعصابات بتاجر بحياة المصري وبات المصري ولا يسوى تعريفه في بلده .. طبعا نفس الشيء عمله الأبعد الواطي بره .. يعني لا سفارات ليها قيمه ولا تعمل أصلاً وقلتها أحسن والأكاده هو أكبر رئيس دوله بيلف حول العالم يهزأ فينا طبعاً لأنه قذر ومرتشي وبيلف يبيع يف البلد عايز الناس تحترمنا منين بقى ؟

أخي الكريم آدم .. تونس الخضراء الحبيبة ..
أقدم لك كل تحية وتقدير وحب واحترامك لك ولإخواننا في تونس الحبيبة اللي شوبير حارس مرمى بصوص الحزن الوطني عايزنا نكرهكم عشان قال إيه يا خويا .. الكوره .. دتهيه فيه وفي الكوره بتاعته دي اللي جابتلنا عشرين صفر وجنوب أفريقيا اللي ما تعرفش تمشي فيها من غير سلاح خطفت تنظيم المونديال 2010 .. المهم أخي الكريم حالتنا في مصر كما هي عندكم تقريباً .. مصيبة تونس زينا بالضبط .. بس بدأت عندكم بدري شويه عننا لأن المنظمات الماسونية جندت الرعيل الأول من قادة حركات التحرر التونسيين في حين أنها فشلت مع عبدالناصر مثلاً .. يعني ما فيش تونسي ولا مصري ولا عربي ممكن يصدق أن الزعيم الوطني الحبيب بورقيبه يقول سيبوا فلسطين للصهاينه زي ما قال قبل عشرات السنين وعزل تونس عن العرب ساعتها .. الفرق الوحيد بيننا وبينكم أخي الكريم أن الماسونية كما قلت لك جندت رجالات تونس أولاً ولم تتمكن من تجنيد قادة مصر إلا في فترة متأخرة قليلاً عن تونس بس ده الفرق .. لكن لو سكتنا هتتحول بلادنا كلها إلى مستنقع ماسوني قذر لا يمكن تحمل الحياة فيه بأي صورة من الصور .. المصيبة أن البعض منا ينخدع بالغطاء البراق للماسونية ويتصور أنها يمكن أن تحقق التحرر طالما أنها تحرره من الدين والعقيدة .. ولكن الحقيقة أن الماسونية تسجنه في قيود شيطانية سخيفة تؤدي بصورة حتمية إلى خنق البلاد والعباد لمصلحة جهة واحده فقط هي بني صهيون .. شكراً لزيارتك وتعليقك الكريم

أخي العزيز مايكل .. شكراً لزيارتك الكريمة وتعليقك الطيب .. ربنا يسهل يا مايكل ويقرب البعيد .. ممكن تشعر بقرب صحوة الجمل دي لما تلاقي التفاف من عدة تيارات حول بعض وتوجيه كل جهودهم نحو إيقاظ المارد .. فرحنا بكفاية وقلنا هي دي اللي ممكن تصحيه لكن للأسف نظام مبارك الواطي قدر يخترقها بطابوره الخامس .. لكن ربك يسترها ويعقل عمنا جورج إسحق وأبو الفتوح وشوية الوطنيين اللي جواها ويلملموا اللي اتكسر .. تعرف يا مايكل أحلى حاجه في حركة كفاية دي إنها لا هي حزب ولا تيار ولا كلام فارغ من ده .. هي حركة زئبقية ما تقدرش الحكومة تمسكها .. المهم أن تتخلى كفاية عن توجهها الأيديولوجي اللي ظهر بصورة بشعه عدة مرات ، حين حضروا مؤتمرات صهاينة في تركيا وحين ساندوا زير الثقافة ضد موضوع الحجاب ، وهو انحياز أيديولوجي غريب على حركة بها كل التيارات وهدفها وحيد ((لا للتمديد .. لا للتوريث)) بغض النظر عن توجهات من بهذه الحركة سواء مع أو ضد ولكن يجب أن تظل موحدة نحو هذا الهدف الوحيد وإن كان لدى البعض منها توجهه الخاص فليكن خارج نطاق الحركة .. المهم الكلام كتير في الأمر ده .. لكن قريباً بإذن الله يا مايكل راح يصحى المارد ويفوق الجمل .. ربك يعدلها ..

أخي العزيز واحد من الناس .. لك التحية .. (( فحبيبة قلبك يا ولدي نائمة في قصر مرصود .. من يدخل حجرتها .. من يطلب يدها .. من حاول فك ضفائرها .. مفقود .. مفقود .. مفقود .. يا ولدي)) دي كانت وجهة نظر نذار قباني في الحرية رحمة الله على الجميع .. طبعاً يا أخي لازم ناس تموت وتتلدغ من الثعابين وتتاكل من الكلاب .. لكن لازم فيه ناس برضه هتوصل وتصحي المارد .. قريباً جدا سيصحو بإذن الله .. فقد علت أصوات الملدوغين والمعضوضين والميتين ولعلها توقظه ..

أخي العزيز أبناء ناصر .. أقدر لك مشاعرك الطيبة وحنقك على أوضاعنا وما نعيشه من يأس وقنوط .. لكنك من أبناء ناصر .. عارف ناصر طبعاً .. وهو ناصر ده جاي منين ؟؟؟ من طين الأرض دي .. من ولاد بهيه .. قريباً سترى أكثر من ناصر ينقضون على الواطي ويجردونه من ثيابه حتى .. الصبر طيب .. بس بلاش يأس لأن اليأس ما لوش مكان بيننا .. ولو حتى كنا حاسين إنه نعجه مش جمل فلو أعطيناه الثقة في أنه جمل هيكون جمل ..

أنا باحترم آرائكم جميعاً .. ولكني أتمنى أن تكون خطأ .. وأنا على يقين من أنكم تتمنون ذات الأمنيه .. يا رب يطلع جمل مش خروف ..

تحياتي للجميع

رئيس تحرير يقول...

الاخ الغالى ابن بهية
تحية طيبة واسمح لىبمداخلة سيادتكم فى مقالكم الذى يحمل نسمات الفرج والقرب بحل المشكلة التى ابلى الله بها شعبنا فنحن بأنتظار ان ينفذ صبر الجمل ويتحرك ولكن سيدى لماذا نكون جمال ولا نكون اسود او نمور لماذا الانتظار على نفاذ الصبر ان هذه الامة التى يتعدى شعبها 70 مليون مواطن كلهم جمال هه جمال مافيش اسد فيها يقود الجمال دى
اعود للموضوع حيث اننى متاكد ان حل المشكلة معنا داخلنا داخل نفسنا البشرية من ارتضى ان يكون ضعيفا ذليلا فسيبقى طول عمره هكذا ولاول مرة منذ معرفتنا اخافك الرأى نحن من اعطى جلادينا الكرباج وبنينا لانفسنا السجون والمعتقلات نحن من قدمنا انفسنا هدية لساكنى القصور نحن دفنا انفسنا غيبنا انفسنا بعدنا عن ديننا ومبادئنا واخلاقنا وتحولنا الى شعب هذيل ضعيف يخاف من خياله اختلفنا وتنوعت ارائنا الفكرية ولكن كان يجب ان نتحد فى مواجهة الازمة ولكن هيهات ثم هيهات اخى الكريم ان والله ان هذه الامة عظيمة ولكنها تحتاج الى قيادة رشيدة واعية وشعب يسخر امكانياته لتطوير وتحديث نفسه نحتاج الى ان نلم شتاتنا ونجتمع تحت سقف واحد على اختلاف ميولنا وافكارنا وعقائدنا لنحل مشاكلنا وننطلق فى طريقنا لنأخذ مكاننا فى الصفوف الاولى للامم المتحضرة يجب ان ترجع لنا كرامتنا اولا ونهدم معتقلات وادى النطرون والوادى الجديد وعاصمة جهنم يجب ان يكون قسم البوليس هو مكان الاحترام الخدمة وليس مكان الاذلال والاهانة يجب ان تكون كل محكمة منارة العدل ومصباح الشرعية واخيرا يجب ان نكون مواطنين اسوياء يؤدون ما عليهم من واجبات وياخذون مالهم من حقوق سيدى جمل ام قطة ام فأر
ولكم وافر الاحترام
اخوك رئيس تحرير

nor يقول...

الشعب كان يوم جمل ...اليوم بقى نعجه
لو تسألوه ليه لما تسرق مصرخش و تـهجه
الحـرااامي "أهه" وبصباعه اتوجه
لو شفتم صوابعه في بق اللئيم بيتعشى

elgharep يقول...

المشكلة ان المواطن الجملى ده بقى دلوقت متخدر بكم هائل من السلع الأستهلاكية والفضائيات والحاجات اللى تنسى بلد أسمها مابالك المواطن الجملى على فكرة اللى أحنا فيه أحنا نستحقه من الألف للياء ببساطة لأننا متخدريين
الغريب

IBN BAHYA يقول...

أشكركم جميعا
إخوتي
رئيس التتحرير المحترم
نور
والغريب
لكم مني كل تحية وتقدير واعتزاز

الموضوع ببساطه إننا محتاجين نتغير .. تغيير بسيط جداً جداً .. يعني نخشوشن شويه ونضحي براحتنا شويه ونعمل حسابنا على زيارة الأسفلت
لو حطينا ده في دماغنا واستسهلناه مش ممكن نخاف منه
ساعتها رايحين نغير كتير أوي أوي
والتغيير التاني المهم برضه إننا نبدأ .. ما ننتظرش غيرنا ونقول بعدين .. لأ .. حتى لو لوحدنا ممكن نضحي
بس عشان يحصل ده لازم نكون مقتنعين بهذه التضحية قناعه تامه
تحياتي للجميع

محمود كمال يقول...

ارجو منك التفكير فى ما فعله سيليجمان (الرئيس الحالي لجمعية علم النفس الأمريـكـيـة ) وهو يدرس تأثير اليأس على الكائن الحي حيث صمم صندوقا تجريبيا قسمه إلى جزأين: جزء معدني وجزء خشبي. وكان يضع كلبا في هذا الصندوق ويغريه بالطعام في الجزء المعدني، ثم بدأ يطلق شحنة من الكهرباء، وتعلم الكلب أن يقفز من القسم المعدني الخطر إلى القسم الخشبي الآمن. بعد ذلك علم سيليجمان كلابه أنه يطلق صفارة ثم يطلق التيار الكهربائي ليصعقها بعد خمس ثوان. وتعلمت الكلاب أن صوت الصفارة تعقبه الصعقة، وفهمت الكلاب فكانت تقفز فور سماعها لصوت الصفارة وحتى قبل إطلاق التيار الكهربائي، وهنا تقدم سيليجمان إلى خطوة أخرى. لقد ربط الكلاب في الجزء المعدني. كانت الصفارة تنطلق فتحاول الكلاب الهرب لكن القيود تمنعها. كانت تحاول الهرب بصورة مسعورة. ثم تأتي الصعقة فتتعذب الكلاب عذابا لا يوصف وهي تحاول المستحيل للهروب من قيدها وعذابها.. تحاول بلا جدوى.. ومع التكرار أصابها اليأس.. أدركت أنه لا أمل.. مهما حاولت لا أمل.. تعلمت الكلاب في البداية أن تقابل الصفارة باليأس فلا تتحرك. لكنها كانت تحاول التملص مع بداية الصعقة.. ثم غلبها اليأس فاستنامت لهذا ولذاك .. وامتنعت عن الحركة حتى مع عذاب الصعق بالتيار الكهربائي، كانت تنام مستسلمة وقد أدركت أن عذابها لا مفر منه ولا جدوى من مقاومته، واقتصر ارتجافها على تقلص العضلات اللا إرادي الذي تسببه الصعقات الكهربائية. كانت تتـداعـى فـي الصندوق مستسلمة للتهديد ولأي عدد إضافي من الصدمات الكهربائيـة من قبل المجرب . تكررت التجربة مرارا عبر أيام عديدة ثم تقدم سيليجمان خطوة أخرى عندما فك قيود الكلاب. ولم تستجب بالهروب للجانب الآمن من الصـنـدوق حـتـى بعد أن فك المجرب عنها قيودها : لقد اكتسبت حالة من اليأس والخمود والاستسلام للواقع المؤلم والعجـز عـن الـهـروب حـتـى ولـو كـانـت مـصـادره متاحة . . نعم .. كانت الكلاب لا تحاول الفرار عند سماعها للصوت الذي يسبق الصعقة بل ولا تتحرك مع الصعقة نفسها فيما عدا حركات الصدمة الكهربية. ومهما ارتفع الصوت أو اشتدت الصعقات لم تكن الكلاب تتحرك.

كانت قد تقوضت من الداخل..

كان بنيانها قد تهدم..

لقد أصابها اليأس..

اليس هذا هو ما فعل(بضم الفاء) بنا منذ زمن اظن ان بدايتة من عصر محمد على ولكننى اراة بشدة فى عهد مابعد الثورة
الا ترى فى هذا تفسير لكلمة مفيش فايدة التى نسمعها يوميا عشرات المرت ؟
الا ترى فى هذا تفسير للخوف واليأس الموجود فى قلب كل مواطن يعيش فى وطننا الميت ؟

وفى النهاية هل تظن اننا كالجمال ام ؟؟؟؟

مذكرات حاحا مصر يقول...

اخي ابن بهية
مبروك .... كل من فلتعلم ان كل من اطلع على مدونتك ورد عليها ما هو الا من ولاد مصر البهية جمل ولا الف جمال (فتح الجيم) شباب ناضج فكريا ثوري لا يقبل الاستبداد وهو افضل بكثير من الاجيال السابقة النائمة في ثباتاً عميق من الالاف السنين الايام القادمة خير دليل

رئيس تحرير يقول...

mego_mego.blogspot.com

IBN BAHYA يقول...

شكرا أخي صاحب مدونة مذكرات حاحا
وكلامك صحيح

أخي العزيز رئيس التحرير
لك مني كل تحية وتقدير
ولمدونتك المحترمة كل التحية

غير معرف يقول...

كلام جميل يرضي بعضاً من غرورنا ، ولكن الحقيقة يا سيدي قد لا تبدو بمثل هذا التبسيط ، فمن العسير إختزال الحالة المصرية الموصوفة بمقالك على أن المصريين حمالين هموم أو ما شابه ، فأرجوا ألا نغفل دور السلبية واللا مبالاة ، واللا إنتماء ، واللا معايشة التي تصبغ وبغرابة شديدة شعبنا التعيس
anayasser.blogspot.com

شادي فايد يقول...

عاوز/ة كل الناس تعرف مدونتك
اشترك في مشروع الغريب لارشيف المدونات
http://elgharep.blogspot.com/2006/12/blog-post_15.html
............
المدونات العربية
http://arabblogs.blogspot.com/
........
بدل لما تحط لستة طويلة باسماء المدونات
عندك في مدونتك
حط اسم مدونة واحدة تحتوي على اسماء كل المدونات
........
عاوز اسمك يضاف الى قائمة المدونات
ارسل لنا اسم مدونتك وعنوانها و اسمك
على
za_shady@yahoo.com
...........
لو عجبك المشروع أخبر به كل اصدقائك لكي ينجح


امضاء
أعضاء مشروع الغريب لارشيف المدونات

غير معرف يقول...

عزيزي إبن بهية

مقالاتك رائعه

اسمحلي ان اتشرف بعرض تلك المسرحية الهزلية السياسية في مدونتك

اثق ان وجودها هنا سيطلع عدد كبير من البلوجرية عليها

تحياتي
____________________________________

مشهد خارجي ... ظلام دامس .... أنوار خافتة مُحيطة
بالبيت الأسود .. الفجر بيشقشق .... أصوات خبط ورزع على
البوابة الخارجية للبيت الأبيض

لورا : يا ساتر يارب .. ده مين السمج اللي بيخبط علينا
الساعة دي ؟ إصحي يا بوشي شوف في إيه

بوش يهب منزعجاً : إيه .. في إيه ؟ أسامه رجع تاني ؟
البرج .. إوعى البُرج .... ناولوني الشبشب ... إستخبي يا ديك ..

لورا : برج إيه يا راجل ما راح واللي كان كان .. ده باب
البيت البراني بيخبط قوم شوف مين .

بوش : أقوم إزاي وأنا بالبيجاما ... قومي إنتي يمكن ماحدش غريب ....

لورا : مين .. مين اللي بيخبط ؟

جيمي : أنا جمال يا طنط

لورا : جمال مين ؟

جيمي : جمال إبن مبارك

لورا : إبن سوزان ؟

جيمي : أيوه يا طنط إفتحي أنا أفأفت من البرد .

لورا : خير يا جمال .. ماما جرا لها حاجة ؟

جيمي : لأ .. ماما بخير والحمد لله ولسه ضاربة مكتبتين
الإسبوع اللي فات

لورا : إوعى تكون إتخانقت مع خديجة .. حاكم أنا عارفها
هاتعمل عليها ماري منيب ؟

جيمي : يا طنط مافيش حاجة ... أرحمي أهلي ودخليني الأول
هاموت من البرد .. وبعد كده إن شالله تبعتيني جوانتانمو يحققوا معايا .

لورا : إدخل يا جمال .. أقعد أتلقح في أوضة المسافرين
عبال ما أصحيلك عمك بوش .... فطرت ولا أجيب لك لقمة تشق
بها ريقك .

جيمي : لأ الحمد لله أنا أكلت شاندوتشين سدُق في القطر وأنا جاي ....
صحي لي أونكل قوام الله يخليكي عشان عايزه في موضوع مهم .

يدخل بوش أوضة المسافرين مرتدياً بيجامته الكستور
وزعبوطاً من نفس نوعية قماش البيجاما .. مع شبشب حمام
أزرق اللون ...

بوش : إيه الشوقه الغريبة دي يا جمال يا إبني ؟ ومالك
لابس لبس ولاد الليل ليه كده ومتلثم ؟

جيمي : أسف يا أونكل إني جاي من غير ميعاد .. لكن
الموضوع خطير خطير خطير .

بوش : يا ساتر يارب !!!!!! إيه إوعى تقولي الشعب المصري
صحي وثار عليك وعلى ابوك ؟

جيمي : بعد الشر يا عمو .. دول نايمين بقى لهم 7 آلاف
سنة .. ولا أصحاب الكهف .

بوش : طب حد لغوص لكو في موضوع الإنتخابات وفقس العملية
؟

جيمي: ماحدش يستجرى يا عمو وأديك شايف إحنا بنعمل إيه في
القضاة .

بوش : يابني تعبت قلب اللي خلفوني وأنا مش فاضليك .. خش
في الموضوع

جيمي : في الحكيكة يا أونكل بوش .. بابا صحي من النوم
من إسبوعين كده ووشه كان أصفر وجسمه بينتفض وفضل ينده ويقول
" هاتوا لي جمال .. انا عايز جمال " .. المهم سيبت
خطيبتي وجتله جري لقيته بيقولي :

(مشهد داخلي ... نهار ما طلعلوش
شمس ... الكاميرا تقترب من غرفة النوم الرئيسية في قصر العروبة ... وتحديداً
يتركز المشهد على السرير الملكي )

مبارك : شد لك كرسي و أقعد يا جمال أنا عايزك في موضوع
خطير ... النهاردة إيه ؟

جيمي : 4 مايو يا بابا ..

مبارك : وده معناه إيه ؟

جيمي : معناه إن الموظفين قبضوا مرتباتهم من 3 أيام يا بابي

مبارك : موظفين .. مرتبات ؟ إنت هاتنضف مخك معايا ولا
أخلى عيشتك سودا ؟

جيمي : بالراحة عليه .... صحتك يا حاج .. حاضر هانضف

مبارك : يابني النهاردة عيد ميلاد اللي جابك .. وأنا
كملت النهاردة 78 سنة .

جيمي : والله ؟ كل سنة وإنت طيب يا حاج ... عن إذنك أوصل
لحد " لا بالما " أضرب دستتين جاتوه على طورطايه و78
شمعه وأجي حمامه .

مبارك : تصدق بالله لو قاطعتني وإتكلمت في الهجايص دي
تاني أنا هاقطع خلفك .... يا جمال يا إبني أنا حاسس إن
يالله حُسن الختام ... وبالمختصر المفيد أنا عايز أقلوظ
لك الكُرسي قبل ما أفلسع .

جيمي : بعد الشر عنك ... ده لو حصل ده أنا أموت نفسي
وراك يا حاج .

مبارك : تموت نفسك ؟ طب ومصر ؟ والمصريين دول مين يشكمهم
يا جمال ؟

جيمي : آه صح ... طب إتكل عالله إنت يا حاج وأنا هابقى
أحصلك ..

مبارك : عشان كده انا عايز تتخفى وتتكتم وفي منتهى
السرية تروح لعمك بوش وتبوس إيده وتقوله " أبويا بيسلم
عليك وبيقولك .. إمتى هايتم المُراد يا جميل .. إحنا
طالبين الرضا والسماح "

جيمي : إيه دا يا بابا ؟... بس أنا بأحب خديجة وإنت
عارف .. وهاكتب عليها بعد موسم القُطن اللي جاي ؟

مبارك : اللهم طولك يا روح ... خديجة إيه وقطن إيه يابني
حرام عليك هاتموتني ناقص عمر .. مين جاب سيرة خديجة ولا
الجواز دلوقت ؟

جيمي : مش إنت بتقولي روح أطلب إيد بنت عمك بوش ؟

مبارك : أنا قلت كده يا رئيس المستقبل .. يا فلته عصرك
وآوانك ؟.. يابني أدم أنا بأقولك روح إستسمح عمك وأطلب
منه يساعدك في القعاد على الكُرسي ...

جيمي : يا حبيبي يا بابي ... والله هاتوحشني لما تروح ..
وهاتوحشني أفكارك البرلنتية ... وتفتكر يا بابا أونكل بوش هايوافق ؟

مبارك : ربنا يهدية .. إحنا بس نرمي بياضنا ونشوف طلباته إيه ؟

--------------------------

جيمي : عشان كده يا عمو أنا جيت لك النهاردة وطالب الرضا
والسماح

بوش : في الحقيقة إنت فاجئتني بطلبك ده .. وبعدين " جينا
" لسه صغيرة وما بتفكرش في الجواز دلوقت ..

جيمي : الحمد لله .. يعني مش أنا بس اللي بأفهم بالشقلوب
..

بوش : قصدك إيه ؟

جيمي : لأ ما فيش حاجة .. ده أنا فتكرت موقف كده حصل
بيني وبين بابي ... يا عمي أنا مش قصدي الجواز من سليلة
الحسب والنسب .. أنا بأقصد إني طالب الرضا والسماح عشان
أقعد وأترستق على الكُرسي وأدلدل رجلي ؟

بوش : آه قلت لي ... طب إستناني أما أضرب واحد كابتشينو
عشان أفوقلك إنت وابوك ..

-------------------------------------------------------------------

بوش : قلت لي بقى أبوك بعتك ليه ؟

جيمي : بابي بيسلم عليك وبيقولك قلوظ لي الكُرسي .

بوش : لأ إستأنا عليه أما أندهلك خالتك أم سلحول ..

جيمي : طب وإيه لزمة طنط لورا في الموضوع الرجالي ده ؟

بوش : لورا مين .. يخرب بيت عقلك وطي صوتك أحسن تسمعك من
المطبخ ... أم سحلول ده الإسم الحركي لخالتك كوندي .

جيمي : آه .. وماله بس بسرعة يا أونكل أحسن عايز اروح
قبل الدُنيا ما تضلم وكمان عشان سايب خديجة في جنينة
المريلاند لوحدها .

بوش : يا عبدو .. يا عبدو ...

عبدو : أوامرك يا افندينا .

بوش : إدي ميسد كوول لكوندليزا خليها تيجي بالعجل .

عبدو : بس يا أفندينا الدنيا لسه الفجر وممكن تكون نايمه
.. وحتى لو صحيت وجت بسرعة فمش هاتلحق تغسل
وشها .. وده في خطر علينا .

بوش : يا سيدي ما بتفرقش كثير .. إندها وخليها تيجي والسلام .

---------------------------

وتأتي كوندي مهرولةً وتدخل أوضة المسافرين على بوش وجيمي
..

كوندليزا وهي تتثاءب : صباح الخير يا مستر بريزيدانت
.... مين جيمي إبن سوزان ... إزيك يا ولا وإزي أمك ؟

جيمي : كويس .. وماما بتسلم عليكي يا طنط وبعته لك معايا
حتة قماش قطيفة تنفع ميكروجيب
.

كوندي : ميرسي خالص يا جيمي ماكنش له لزوم .. وإبقى سلم
على ماما .

بوش : جيمي يا ستي جاي وجايب معاه رسالة من والده بيقولي
فيها أقلوظ له الكرسي

كوندي : وماله يا مستر بريزيدانت .. بس كله بثمنه

جيمي : وأنا رقبتي سداده يا طنط كوندي ..ومستعد دلوقت أكتب لكو أي حتة في مصر بيع وشرا .. من أول توشكى لحد شرم الشيخ بتاعت بابا .

بوش : إحنا ناس مش بتاعت فلوس يا جيمي وابوك عارف كده
كويس .. إشرحي له أكثر يا كوندي .

كوندي : بص يا جيمي .. إحنا لازم نعملك الأول كام إختبار
على كام تحليل حاجة كده زي كشف الهيئة عندكو .. ونشوفك
تنفع ولا لأ ..

جيمي : أنا متأكد من نفسي يا طنط وصحتي عال العال وأفوت
في الحيطه وأعدي البحر ولا أتبلش .

كوندي : عال عال ... نخش على أول سؤال .... س : ما هو
موقفك من الدولة القطقوطة الأمورة إسرائيل في حالت قلوظت الكرسي لك؟

جيمي : ج : بسم الله الرحمن الرحيم .. إسرائيل بالنسبة
لي دولة مُسالمة .. وعيال بتوع سلام من أول أونكل بن
جوريون مروراً بتيته جولدامائير وصولاً إلى عمي الحاج
شارون ربنا ياخد بيده ويقومه لنا بالسلامه ونهايةً بأونكل
إيهود أولمرت اللي هو حبيبي وإبن حبيبي وباب بيعزه معزة
الأخ لأخوة .

كوندي : يخرب عقلك إنت بتجيب الكلام ده منين ... صحيح يا
ولاد - وقالت ولاد بالإنجليزي يعني بويز - اللي خلف
مامتش ..... السؤال التاني : ما هي علاقتك ببشار الأسد ؟

جيمي : ولا أعرفه .. ده راجل بتاع مشاكل زي أبوه ..
وبابا قال لي : يا جيمي يابني مالكش دعوة بالأشرار ...

كوندي : ج : ما هو موقفك من مشكلة العراق ؟

جيمي : دي مشاكل عائلية بناتهم وهايصفوها .. سونر أور
ليتر .

كوندي : ما هو موقفك من المعارضة المصرية الداخلية
وخصوصاً الإخوان المسلمين ؟

جيمي : إحنا دولة مؤسسات - أحداث - ونحن سائرون قُدماً
في مسيرة الإصلاح .. واللي ماربهوش أهله تربيه المعتقلات والسجون.

كوندي " والله الولا ييجي منه يا مستر بريزيدانت ...
السؤال الأخير وده من عشر درجات ... ما هو موقفك من خلفة
العيال ؟

جيمي : حضرتك أنا من إيدك دي لإيدك دي .. عايزاني أخد
برشام منع الحمل من أول يوم .. ماشي .. أشيل الرحم خالص
.. أوكي .... أنا جاهز

كوندي : يابني مش قصدي .. أنا أقصد إيه نظام التوريث
بالنسبة لك ؟

جيمي : حضرتك يا طنط أنا أتفقت مع خديجة إننا نشد حيلنا
في الكام سنة الأولانيين ونضرب 3 أو 4 عيال أول سنة ..
بحيث لما أدقدق شوية في الحُكم يكونوا كبروا وحد يمسك
بدالي وسلمني نضيف أسلمك نضيف .

بوش : أنا مبسوط منك يا جيمي ... خلاص تقدر تروح دلوقت
وقول لبابا عمو بوش بيقولك " مبروك يابو الريس " إنت
راجع إمتى ؟

جيمي : حضرتك أنا حاجز في ديزل الساعة 12 .. يعني يادوب
ألحق .... وخلي بالكم إنتوا معزومين على فرحي الشهر
الجاي ... وياريت تجيب طنط لورا معاك يا أونكل وقولها
نانسي وشعبولا هاييحيوا الليلة .


وهنا تدوي زغاريط الفرح في أرجاء البيت الأبيض.

آدم يقول...

اخي العزيز؛ المدونون التونسيون يخططون لاضراب عن التدوين احتجاجا على حجب بعض المدونات و ذلك يوم الاثنين المقبل؛ مارأيكم او انضممتم الينا؛ و يكون بذلك يوما عربيا لاحتجاج على الحجب الذي يطال بعض المدونات؛ اذا كنت مهتما بالامر و بامكانك المساعدة في نشر ذلك في المدونات المصرية اتصل بي

IBN BAHYA يقول...

أولا أشكرك أخي الكريم على ثقتك الغالية وأتمنى أن نكون عند هذا الظن .. ثانيا موضوعك جميل جداً وفي محله
خفة الدم المصرية ماليه المكانوالزمان
كنت عايزك بس تضيف سؤال أخير لكوندي في اختبار جيمي مبارك الواطي

تقوله إيه رأيك في ماكس ميشيل والمسيحية الصهيونية؟

طبعا راح اساعده يا طنط وأديله عشرين كنيسه والبابا شنوده لو عايزيني أسجنه راح اسجنه وأطلع عنيه

أصل السؤال ده كان محور زيارة جيمي السرية اللي فاتت

عموما عمل جميل جدا
أطيب تمنياتي بالتوفيق

IBN BAHYA يقول...

نحن معكم يا أخ آدم وسأحاول نشر ما سقته في مدونتك على بعض المدونات المصرية والعربية قدر الاستطاعة

يوم الاثنين القادم هو يوم غير عادي في عالم المدونات التونسية؛ حدث هام ؛ لأول مرة في المدونات التونسية سيتم تجنيد الجميع من اجل هدف واحد؛ أمر أصبح يؤرق الجميع؛ ألا و هو الحجب المتواصل و الغير المفهوم لبعض المدونات التونسية؛ سنعبر عن رفضنا لهذا التصرف إيمانا منا بحرية التعبير و دفاعا عنها بطريقة حضارية و سلمية؛ سندخل يوم الاثنين 25ديسمبر في اضراب لمدة 24 ساعة؛ لم يتفق إلى الآن على كيفية الإضراب؛ لكن اغلب الآراء ترشح أن يتم نشر مقال ابيض؛ لا يحتوي شيئا؛ لذلك أنا أدعو كل المدونين و المدونات الى المشاركة في هذا الإضراب حتى يكون إضرابا ناجحا و ننجح بذلك في إيصال صوتنا لمن بهمه الأمر. كما قمت و بمبادرة شخصية بدعوة بعض المدونين العرب إلى الانضمام إلينا لان المشكل ليس تونسيا فقط؛ وإنما هو عربي أيضا؛ فلما لا يتحول يوم 25 ديسمبر من كل عام إلى يوم عربي لاحتجاج على الحجب الالكتروني؛ الأمر كله يتوقف على مدى استجابتكم لهذا النداء و حماسكم؛ فكونوا في الموعد

http://www.saharaclub.org/blog/

آدم يقول...

شكرا لك

karim adel يقول...

ايها الناس اسمعوا وعوا انه من عاش مات ومن مات فات وكل مكل ماهو اتآ ات ليلا داج ونهار ساج ونجوم ذات ابراج
اين الفراعنه الشداد

adam يقول...

هذا رد كتبته لمحد سعيد احجوج في مدونتي و الكلام فيه موجه لك ايضا

كما قلت لك؛ مازال الامر لم يتحدد
نهائيا؛ بالنسبة لامر تأخير الاضراب هذا في الحقيقة ليس بيدي وحدي؛ لقد عرضت الامر على المدونين في تونس و ساخبرك بردهم؛ في الحقيقة نحن لا نستطيع ان نؤجل على امل ان ينضم الينا بقية العرب ثم لا يحدث شيء؛ سيكون موقفي محرجا وقتها؛ انا اريد تأكيدا هل هناك رغبة في المشاركة من بقية المدونين ام لا؟ للاسف ليس لدينا الكثير من الوقت؛ اذا وصلتني تأكيدات بالمشاركة
وقتها فقط يمكن ان نؤجل؛ لذا ارجو منك ان تبذل قصارى جهدك اليوم و غدا على اقصى تقدير
تحياتي

آدم يقول...

هل يمكنك كتابة تدوينة في الموضوع؛ او بامكانك نشر ماكتبته في مدونتي
انا اعتمد عليك

nour hitler يقول...

السلام عليكم لكل احباء ناصر
ولكل غيور علي هذا البلد ادعوكم لزيارة موقعي

nourhetler2006.jeeran.com

chanfara يقول...

أخي العزيز

على إثر مصادرة و قطع شرطة الانترنت في تونس لبعض المدونات قررنا الدخول في حركو إحتجاجية جماعية و نطلب إن أمكن مساندة المدونين العرب

لمزيد من المعلومات قم بزيارة الرابط التالي



http://attounissia.blogspot.com/2006/12/action-note-blanche-action-blank-post.html



شكرا

أيمن

chanfara يقول...

أخي العزيز شادي

على إثر مصادرة و قطع شرطة الانترنت في تونس لبعض المدونات قررنا الدخول في حركو إحتجاجية جماعية و نطلب إن أمكن مساندة المدونين العرب

لمزيد من المعلومات قم بزيارة الرابط التالي



http://attounissia.blogspot.com/2006/12/
action-note-blanche-action-blank-post.html



شكرا

أيمن

شادي فايد يقول...

عايز كل الناس تعرف مدونتك
ضيف نفسك في ارشيف المدونات العربية
http://arabblogs.blogspot.com/
ارسل لنا اسم مدونتك و عنوناها و اسمك

في كومنت على

http://arabblogs.blogspot.com/2006/12/blog-post.html

ابعت نفس الرسالة دي لكل اللي تعرفهم

آدم يقول...

شكرا اخي العزيز؛ الموعد كما هو يوم الاثنين؛ في الواقع عندما تم التفكير في يوم الاثنين؛ لم يتم التفكير في بعد عربي للاضراب؛ و لم نعتقد ان نجد تجاوبا كبيرا في العالم العربي؛ هذه اول مرة نقوم فيها بحركة مماثلة؛ تنقصنا التجربة هذا امر واضح؛ و لكن مع ذلك انا متفائل؛ و انا اعتمد عليك و على الاخوة في مصر لمساندتنا؛ هناك ايضا نص في المدونة التونسية؛ و هناك تجد كودا للشعار- اضغط على الشعار في مدونتي سيحملك الى المدونة التونسية.
تحياتي

maf2ou3a يقول...

i couldnot agree more with u
u are totaly right the egyptian people has been terrorized for years of thier lives from pharos until the glory of the revolution
its a part of who we are we never object and even when we get rebilious
betkoun thwaratna khayba

غير معرف يقول...

سلام مربع لابن بهية
انت ابن الارض
بتحس بنبضنا
انت مصرى اصيل بتعبر عن اللى جوانا
بس يا صاحبى الديابة كتير
وجهدنا قليل ونفسنا مقطوع
لانهم استوردوا لنا بانجوا
وخدروا الشعب
الشعب متبنج
ونايم فى العسل مش دارى رايح فين