على الضريح .. يوم الميلاد

قصيدة على الضريح
في رثاء الزعيم الراحل جمال عبد الناصر بلال الأمه العربيه .. نشوف

السكه مفروشه تيجان الفل و النرجس

و القبه صهوة فرس عليها الخضر بيبرجس

و المشربيه عرايس بتبكي و البكى مشروع
من ذا اللي نايم وساكت و السكات مسموع

سيدنا الحسين؟

ولا صلاح الدين

ولا النبي

ولا الإمام؟

دستور يا حراس المقام
ولا الكلام بالشكل دا ممنوع؟

على العموم أنا مش ضليع في علوم الأنضباط

أبويا كان مسلم صحيح و كان غبي

و كان يصلي ع النبي عند الغضب و الأنبساط

أبويا كان فلاح تعيس

في ليله ضلمه خلفوه

و ف خرقه سودا لفلفوه

و ف عيشه غبرا طلعوه

و عشه مايله سكنوه

و لصموه

و طلسموه

و دجنوه

و جهزوه

و جوزوه على عماه

فكان محير في هواه
ما بين امي و الجاموسه

و كان يخاف يقتل ناموسه

و كان خجول .. خجول .. خجول

و كان دايما يقول
استغفر الله العظيم من باب الأحتياط

أبويا طلعتوه حمار
فكان طبيعي يجيبني جحش

لا اعرف نبي من أجنبي

و لا مين ما جاش ولا مين ما رحش

موسى نبي

عيسى نبي

كمان محمد كان نبي

و يا قلبي صلي ع النبي

و كلنا نحب النبي

و كل وقت وله أدان و كل عصر و له نبي

و احنا نبينا كده من ضلعنا نابت

لا من سماهم وقع ولا من مرا شابت

ولا انخسف له القمر ولا النجوم غابت

أبوه صعيدي و فهم قام طلعه ظابط

ظبط على قدنا و ع المزاج ظابط

فاجومي من جنسنا

ما لوش مرا عابت

فلاح قليل الحيا إذا الكلاب سابت

ولا يطاطيش للعدا مهما السهام صابت

عمل حاجات معجزه .. و حاجات كتير خابت

و عاش و مات وسطنا

على طبعنا ثابت

و ان كان جرح قلبنا

كل الجراح طابت

ولا يطولوه العدا

مهما الأمور جابت

عموماً عمنا الفاجومي اعترف بأنه ((مش ضليع في علوم الإنضباط)) يعني الرضا والسموحه ومش عايزين فزلكه وكلام ساقع من عينة تأليه الزعيم والذي منه .. كل ده كلام عبيط .. ناصر لا هو إله ((والعياذ بالله)) ولا نبي .. كان بس ولد .. ولد صعيدي .. فلاح .. معجون من طمي نيل مصر .. من ترابها وعرق فلاحينها الطيابه .. وعمالها الغلابه وهو ده اللي رفعه فوق الرؤوس وحجز له مكان فسيح في القلب اللي جرحه .. بس كل الجراح طابت على رأي عمنا الفاجومي .. كان فاجومي من جنسنا .. ما لوش مره عابت ولا باعت البلد لأخوالها الصهاينه بتوع المحافل الماسونية في لندن .. ما بيطاطيش للعدا ويلحس تراب جزمة بوش ورايس وأولمرت .. عمل حاجات معجزه .. وحاجات كتير خابت (عادي .. لأنه بشر)) بس المهم عاش ومات في وسطنا .. على طبعنا ثابت .. عمره ما اشتغل سمسار ولا باع الوطن ولا مرة أخد عمولات ممن بره بره على سويسره .. ولا اخترع لجنة وكوسات لإبنه عشان يوكس البلد بيها ويخلص على اللي باقي فيها .. ومات وفي بيته 84 جنيه مصري .. 84 جنيه مصري .. مصري .. مش 84 مليون ولا مليار دولار في بنوك سويسره .. طيب راجل شريف .. عفيف .. نضيف وسكره زي ده ما يتحبش ؟


رحمك الله يا جمال .. وغفر لك ما تقدم من ذنبك ورحم الله مصر من بعدك .. مصر التي مازالت تعيش بلا زعيم .. بلا قائد .. بلا رئيس .. مازال كرسي الرئاسة شاغراً يا ناصر .. فالعملاء .. الخونة لا يمكن لبهية أن تقبل بهم رؤساءً ولو عروا ربع قرن .. فهل يرحمنا الله سبحانه ويرسل إلينا رئيساً مصرياً مثلك في يوم مولدك .. نسأل الله ذلك ونبتهل إليه أن ينجي مصر ويزيح عنها الغمة .. لينبلج صباحها .. فقد طال الليل .. طال الليل .. طال الليل