شكراً يا قاضي العسكر

شكراً للقاضي العسكري أو الحاكم العسكري أو زي ما بيسموه على لطش النائب طلعت السادات بسنة مع الشغل والنفاذ كي يوقظ النائمين في عسل الإعلام المصري الداعر بأننا نعيش مساحة ديموقراطية .. وانطلاقة ثانية .. ## طيب هي فين الأولى لا مؤاخذة ؟؟؟ مش كانت نطه للخلف ولا أنا غلطان يا ابن سوزي؟؟؟## .. وإصلاح وبطيخ وما إلى ذلك من الوهم الإعلامي الذي يقوده مجموعة من القوادين الجدد أو رؤساء الصحف الجدد ممن يتقنون جيداً دور قرني ويسطلون الزبون بالمخدرات الإعلامية التي توهم الناس بمساحة ديموقراطية مكذوبة حتى يتم اغتصابهم مليون مرة والأجرة في جيب رئيس القوادين وعصاباته وللقوادين.

نعم يا سيدي القاضي المبجل نشكرك على هذا الحكم العادل في حق السادات ليكون صرخة توقظ النائمين على حكايات الشاطر حسني والأميرة سوزي وولي العهد جيمي الرئيس الصغنن وفتونة أمه البقيقي من شاكلة البرنامج النووي .. نووي إيه يا ابن العبيطة اللي انته جاي تقول عليه ؟؟؟ المهم شكراً يا قاضي يا فاضي .. طبعاً فاضي لأنك عسكري ## أنا مش عارف إيه لازمة العسكرية بقى طالما استسلمنا لإسرائيل وباقي نتحد معاها لنكون محافظة تابعة لها .. ويقول عنا السيد حسن نصر الله ما بعد بعد بعد بعد بعد حيفا ## تعرفوا إيه الله غايظني وفاقع مرارتي في الحكم ؟ ما جاء بالحيثيات من أن طلعت السادات أساء للقوات المسلحة .... يادي النيله .. هي فين لاقوات دي ؟؟؟ ومسلحة كمان ؟؟؟ طيب بأمارة إيه يا سعادة اللواء ؟؟؟

بأمارة عساكر الأمن المركزي الغلابة اللي رامينهم في سيناء للصهاينة يذبحوا فيهم كل يوم زي الفراخ ؟؟؟ بأمارة سكوتكم ومشاركتكم للعميل حسني مبارك وعصاباته في بيع البلد للصهاينة بالكيلو ؟؟؟ فهمونا بأمارة إيه ؟؟؟

مع يقيني أن ما فعله النائب طلعت السادات لم يكن به أي إساءة .. ويقيني من أن حكومة مبارك العميل مرتبة الموضوع عشان تحمي الغربان القذرة من أمثال عز اللي ملمومين حوالين الزغلول الصغنن جيمي سوزان ... برغم هذا فإنني لا أجد سبباً مقنعاً للموضوع بسبب غياب صاحب الموضوع أصلاً ... فين هي دي القوات المسلخة اللي بيقولوا عليها ؟؟؟

في عام 1973 كان على الجبهة أكثر من مليون وربع جندي وأضعاف العدد احتياط .. تعالوا نشوف عندنا كام جندي دلوقت ؟؟؟ عندنا أقل من ربع مليون في كل بر مصر .. يا سلام سلم ... الصهيونية والعمالة بتتكلم !!! دي إنجازات عهد مبارك يا جدعان ...

لأ والأكادة أن الباشوات العسكر دول شغالين زي ما حضراتكم راسيين في البزنسة والعمولات والذي منه .. يعني مبارك العميل حول البلد لخرابة وبقرة في انتظار السكين الصهيونية عشان تخش شبرا في عشر دقايق ...

الباشوات اللي مسمينهم قوات مسلخة شغالين تجار أراضي وعقارات من كبيرهم لصغيرهم .. الكبير أراضي والصغير شقق والأصغر شقق مفروشة على قد حاله في زهراء مدينة نصر اللي بقت زي ما حضراتكم راسيين حي الدعارة الأول في مصر من مئات الشقق المفروشة بتاعة الأفنديات الضباط بتوع الجيش أو القوات المسلخة اللي حبسوا طلعت السادات بحجة شتمها ...

بس برغم ده كله بنقول شكراً للقاضي حتى ولو كان فاضي .. لأنه كشف من غير ما يعرف نظام مبارك العميل اللي بيضحك على الناس في صحافته الداعرة وكلامه عن الديموقراطية .. وقال إيه في عهده الغير مبارك بالمرة حصلت مصر على مساحة ديموقراطية كبيرة ... والنبي إيه ؟؟؟ هو مين بيمنح مين يا قوادين ؟؟؟ مش الديموقراطية دي هي اللي الشعب بيجيب بيها الحاكم ولا الحاكم هو اللي بيتفضل ويتكرم ويتعطف ويمنح الشعب ربع كيلو ديموقراطية ؟؟؟؟

شكراً يا قاضي لأنك صحيت النايمين شوية .. وشكراً لأنك أكدت لنا أنه لا حاجة للبلد بالجيش ولا فائدة منه أساساً .. كان فيه ناس عندها أمل في الجيش يكون فيه راجل ويقف لحسني العميل وعصاباته اللي نازلين نهش في لحم المصريين بأنياب ذئاب نجسة .. لكن كده أكدت لنا يا سيادة القاضي العسكري أننا لا يجب أن نعول أبداً على جيش هذا حاله بعد أن دمره مبارك العميل كما وكيفاً ورماه في الترعة واللي فضل منه بقى بوابين على العمارات ..

كفاية والله تعبت وقرفت .. تصبحوا على خير ...