24 نوفمبر 2006

حارس مرمى منتخب اللصوص

حارس مرمى منتخب اللصوص أو حارس مرمى الحزن الوطني أو نجم الحزن الوطني أحمد شوبير الذي حول الرياضة والكرة إلى لافتات قماشية رخيصة للدعاية إلى حزب الحكومة القذرة التي تسلق وتملق ولزق نفسه فيها حتى يصل سريعاً ويحسب من الواصلين إلى المليارات وقلب المحروس بتاع لجنة السياسات جيمي سوزان .. هل تذكرون بطولة أفريقيا التي كان شوبير يعقد لها يومياً أمسية قرنية تعريصية عريضة يمارس من خلالها عمله المحبب إليه والذي حجبه عنا زمنا طويلاً ؟ كانت كاميرا دريم لا تلتقط من المائة ألف مصري في المدرجات إلا جيمي سوزان وهو يصفق ويتفاعل مع الجمهور حاملاً أعلام مصر مع شوية العيال اللي حواليه .. فاكرين .. طبعاً وليه لأ وقد اختاره جيمي سوزان ليكون معيناً له في شقلبة أفكار الشباب وجذبهم نحو الحزن الوطني القبيح مثل الاثنين .. صحيح الطيور على أشكالها تقع .. يا رب يقعوا بجد ونخلص ..

الوظيفة الجديدة التي منحوها لشوبير بدرجة قرني أول هي التي أوصلته إلى كرسي البلمان ((زي ما كان بينطقها شوبير قبل ما يبقى عضو فيه وياخد دورات اللغة الإنجليزية اياها ودورات العلاقات العامة وعلاج عيوب النطق والكلام على حسابنا عشان الأهبل يتعلم يضحك علينا)) حولته بقدرة قادر من معلق رياضي فاشل وصوته يقطع الخميرة من البيت وحارس مرمى محترم إلى مطبل سياسي يشار له بالبنان وحارس مرمى الحزن الوطني ..

فجأة وقبل احتفاليه جلوسه الأول على كرسي البلمان ظهر عليه خير مصر المنهوب وظهرت عليه علامات الثراء الفاحش وكله بثمنه .. كل ما الكابتن يذيع ويطبل كل ما الملايين تزيد وتكبر والمشاريع تكتر وشيلني واشيلك أنا برضه فرحتلك ، وركب قرنين تركب مازدا .. على رأي عمنا الشيخ إمام عيسى الله يرحمه ويخليلنا عمنا الفاجومي .. بالمناسبة المازدا دي كانت شروة سيارات مازدا جابوها لضباط الجيش الكبار عشان يتلهوا ويطنشوا .. يعني يرشوهم بيها ويأمنوا جانبهم زمان لما كانت الأمور بسيطة .. اليوم ضباط الجيش الكبار بياخدوا حقهم ناشف .. يعني كام ألف فدان أرض زراعية ولا سياحية على شواطيء مصر أو كام ألف متر في التجمع الخامس وأكتوبر ووو .. ويبيعوها لينا بالملايين مع إننا لينا فيها بحكم إننا مصريين زيهم ومكتوب كده والله في شهادة الميلاد.. .. طبعاً الضباط الصغيرين بياخدوا يادوب حتة شقه صغنونه .. إيه ؟ مش عاجبهم يتفلقوا .. على فكره أي حركة عسكرية مباركة في مصر زي الفال الحلو بتاع موريتانيا مش منتظر أبدا تيجي من الكبار .. الأمل في الضباط الصغيرين .. ربنا معاهم لو فيهم رجاله من أولاد بهية وبيحبوا مصر بجد ..

المهم عمنا شوشو حارس مرمى البلمان والحزن الوطني مش ناوي يبطل قلة الأدب بتاعته دي اللي ما كانتش معهوده فيه زمان لما كان نجم بجد مش نجم حزب التعريص .. أي نعم هو كان طول عمره قفل وصوته وحش كمعلق لكن الناس كانت بتحبه عشان الكوره ككل جيله ممن ذهبوا إلى إيطاليا عام 1990 وهذه فقط كانت تغفر له التعليقات الحصاوي وأنكر الأصوات عند الجمهور .. لكن أن يحول البرامج التي يقدمها من كوره إلى سياسة وياريت سياسة محترمة إلا هي مجرد تعريص وقرننة للحزن الوطني ده اللي مش ممكن نسامحه عليه وطبعا مش ممكن نسامحه على الملايين اللي بينهبها جناب النايب من ورا سبوبة شغلته كقرني وحارس مرمى الحزن الوطني دي ، لأنها ببساطة يا كابتن شوشو فلوسنا وفلوس عيالنا وبلدنا وهم أولى بيها منك ومن زمايلك القرنية كلهم ولا رأيك إيه ؟؟؟ عموماً حقي وحقك وحق الكلاب .. ده موضوع مؤجل ليوم الحساب زي برضه ما قال عمنا الفاجومي .. لكن هل يمكن أن يصل الوفاء الكلابي بعمنا شوشو إلى طاعة عمياء لتعليمات لجنة سياسات المحروس جيمي سوزان وينزل بهدله في أي مواطن عربي آخر بحجة الغيرة على مصر ؟؟؟

طيب والله لو غيران على مصر بجد كنت تستحي على دمك وتخف شوية .. مش تبطل لأ لا سامح الله .. بس تخف شوية النهب والاسترزاق من ورا التعريص والدعاية الرخيصة للحزن الوطني اللي بتحاول تنفيها بوقوفك الباهت الخايب المكشوف ضد الحكومة في موضوع وحيد يتيم وما لوش لازمه أصلاً .. سيدنا شوشو من يوم موضوع الجمهور التونسي ما شجع فريق آخر غير مصر وهو ما يصدق يلاقي هفوة وينزل تبهديل وتخبيط فيهم والأكاده أنه يردف بكلمة كلنا عرب وكلنا مهلبية .. طيب لما جناب النايب في البلمان عارف كده وحاسس إننا كلنا عرب كان ليه من الأول بيشتم ويلعن ؟؟؟ عموماً دي موضه حالياً حكاية المصرنة والافتخار والفشخرة إننا مصريين وفوق كل الكلاب العرب اللي ما لهمش عازه أصلاً في الحياه غير يسقفولنا وبس ويغنوا مصر أمنا .. والنبي ده كلام ؟؟؟

طبعا أنا لا أستثني إخوانا العرب من ذلك الفخ العبيط الذي أوقعهم فيه بعض بني جلدتهم من كراهية مصر لأسباب معروفة ومفهومة وحكى عنها بيجن في مذكراته لما قال أعظم انتصار حققته إسرائيل في تاريخها كله ويوازي إعلان قيام الدولة سنة 1947 ، وانتصارهم على العرب في سنة 1967 هو عزل مصر عن العرب بعد كامب ديفيد الأسود .. طبعاً حبايبنا الصهاينة زي ما ليهم عندنا لجنة سياسات المحروس جيمي سوزان ليهم برضه لجان مشابهه في كل بلادنا العربية من الخنازير الخونة ومن تبعهم من جحوش ما بتفهمش حزمة البرسيم وتنهق باللي يقولوهه ليها وخلاص زي الشباب الغلابه اللي ماشيين ورا لجنة سياسات جيمي سوزان وجمعيات المستقبل بتاعته .. هو بيقول مستقبل وأبوه الواطي بيعبر للمستقبل من ربع قرن .. طيب هو فين المستقبل ده يا كلاب ؟؟؟ انتوا خليتوا مستقبل ولا ماضي ولا حاضر ؟؟؟ أنتم أحرقتم كل أزمنة مصر يا كلاب .. في عهد الأبعد حسني الواطي تم بيع ماضي مصر بالكيلو وحاضرها أديكم عايشينه .. زفت .. والمستقبل ظلام في ظلام وربك الستار .. مستقبل إيه اللي بيحكي عنه إبن العبيطه ده هو وأبوه الواطي؟؟؟

يا ريته كان كلام بجد وحق وحقيق .. ولجنة سياسات المحروس بتحب مصر والمصرنة بجد ، لكنه كلام في الهوا لزوم الاستهلاك المحلي عندنا بس عشان قال إيه .. نعرف الشعب إننا مصريين ووطنيين .. طبعا الحقيقة المرة معروفة وهي أنهم لصوص ومصاصي دماء المصريين .. اللي بيحب مصر يا قفا منك له ما ينهبهاش ويبيعها للعدو .. اللي بيحب مصر يا قفا منك له ما يجيلهاش الصهاينة ويزرعهم جوا مصارينها زي ما بتعملوا ببيع القطاع العام والأراضي والمصانع للصهاينة .. وإمته يا أنجاس كان حب مصر على حساب كراهية إخوانا العرب ؟؟؟ مش بالذمة دي نكته بايخه ؟؟؟

حالة المصرنة الغريبة اللي نازلين فيها بتوع لجنة سياسات المحروس دي محتاجه مننا وقفة .. وقفة للدراسة والتحليل مين وراها وليه وعشان إيه ؟؟؟ من إمته يا جحش منك له كان حب مصر معناه نكره إخوانا العرب ونكرهم فينا ونلعن سنسفيل جدودهم ؟؟؟ طبعا البديل جاهز عند حبايبنا الحلوين بتوع لجنة سياسات جيمي سوزان من عينة كابتن شوشو .. طالما كرهنا العرب وضربناهم ستين صرمة قديمة يبقى نحب ولاد عمنا التانيين ونبطل الشعارات الفارغة من عينة ((يا أنا .. يا السفارة في قلب العمارة .. ومش هنسلم .. مش هنبيع .. مش هنوافق عالتطبيع)) ولازم في الخمسة وعشرين سنة اللي جايه ((فترات حكم جيمي سوزان)) نبقى سمن على عسل مع الصهاينة وناكل بيضهم ونلبس قطنهم وسلملي على شواربك لو كنت لسه عندك شوارب .. تصبحوا على الكوايز ((الاتفاقية الاقتصادية المصرية الصهيونية .. فاكرينها ؟؟؟ يوم ميلادها الأسود إمته .. صوتي يا بهية))

هناك 15 تعليقًا:

mego-mego يقول...

السيد الاستاذ الفاضل ابن بهية لسيادتكم وافر الاحترام واسمح لى يا اخى التعليق على كلامكم
اولا السيد احمد شوبير ليس حالة جديدة او شاذة استطاع النظام خلال فترة حكمه ارغامنا على تقبل شخصيات بعد تلميعهاالراجل لاقى نفسه بعد الاعتزال وانحسار النجومية والشهرة امامه عرض سخى فقبل العيب فينا يا اخى سلبيتنا وعدم وعينا الجيد ساعد نظام الحكم على ايصالنا الى ما نحن فيه الخوف الزائد من ما قد يحدث لنا استطاع ان يوقفنا عن اى عمل سياسى سيدى انادى دائما ونحن فى قلب هذه المحنة بتوحيد جميع رموز المعارضة اخوان مستقلين كفاية معارضين اشتراكيين ليبراليين كل الشعب يجب ان يتوحد تحت سقف واحد وينتبهوا جيدا لسياسة فرق تسد ان الله لا يضيع اجر من احسن عملا ونحن لا نحسن عملا سيدى ابن بهية اتخيل فى اى لحظة ان يتم توقيفى وعمل ما لا يسر معى ولكنى مستعد ان اضحى من اجل ولدى وبناتى ان يعيشوا مرفوعى الراس فى بلد عاش فيه والدهم مطأطأ الراس
وادعو الله ان يسدد خطاك
واشكر السيد عنتر مش لاقى سيفه على التفضل الكريم منه بالتعليق على كلامى وادعو له الله ان يجد سيفه وعندها سوف يصبح سيفا باترا للظلم والفساد
وشكرا
رئيس تحرير

غير معرف يقول...

السلام علي من اتبع الهدي

السيد ابن بهية المحترم

لك تحياتي علي ما كتبت و ما ستكتب ان شاء الله..و كاضافة بسيطة لما ذكرته و قمت بتحليله..لو نظرنا من بعيد بعين المتفحص لمجريات الامور و ليس بعين من يعايشها..سنجد ان مصر قد مرت من قبل بالعديد من المحن و السنوات العجاف التي انتشر فيها الفساد..و كقارئ للتاريخ الذي لا يطلع عليه الكثيرون بحكم التورية التي تمارسها كل وزارات التربية و التعليم..ستجد ان مصر اتي عليها احقاب كثيرة مماثله تتماما لما تعيشه الان...احقاب انتشر فيها الفساد و السرقة و العبودية و الذل و الرشاوي و التعذيب و التجسس...حتي بات الاخ يتجسس علي اخاه و الابن يرشد عن واله و كذلك والله الزوج مع زوجته...اذن ليس بجديد علي بهية و اولادها ان يمروا بتلك الظروف...و لكن لنستفسر عن ما هو الجديد اذا...ما هو الشيء المختلف عن ما سبق...ستجد ان اولاد بهية ينقصهم الكثير حت يستحقوا لقب اولاد بهية..مش عارف ايه هة بالظبط اللي ناقص...هل هي التوعية ام المعرفة ام الشرارة اللازمة للانطلاق...دائما اري اولاد بهية كانهم الماكينات او الالات الجاهزة للانطلاق و الدوران و الانتاج و لكن ينقصها التيار الكهربائي....كمن يمتلك سيارة قوية عفية شديدة و ليس بها بنزين...يا تري ما هو البنزين و ما هي مصادر التيار التي تنقص اولاد بهية حتي يتم التشغيل...لا اعلم بصراحة

لا تستغرب يا اخي علي احمد شوبير و ما حدث له...فهة عينة ليس اكثر و لا اقل من عينات النظام و المتوددين اليه...علي رأي الاخ العزيز ميجو ميجو..و صحيح اشمعنا هو يعني اللي هاتيجي عليه...ما كولو شغال..يا سيدي اركن ضميرك علي الرف شوية و اديلو اجازة مفتوحة و ربك غفور رحيم..

تفتكر ممكن الاقي سيفي في يوم من الايام..تفتكر اولاد بهية ممكن يلاقوا سيوفهم و لا خلاص اخادوها مننا و مش هيرجعوهلنا تاني..و نجيب سيوف جديدة منين..مفيش حد هيرضي يدينا سيوف..لازم نروح ناخدها بنفسنا.

ملحوظة عجيبة اوي..المدونات انتشرت بطريقة جميلة جدا و لكن اليس من المفترض ان يكون هناك نتيجة لهذا الانتشار..انا خايف اولاد بهية يفهموا موضوع المدونات دة انه مجرد وسيلة للتنفيس عن الغضب و خلاص..بمجرد انه كتب كلمتين اعترض فيهم علي النظام و سب و لعن و شتم..يبقي كده خلاص كله ...مش عارف ايه المفروض اللي يحصل و لكن اكيد لازم يكون في هدف تاني للمدونات غير التنفيس بس...لازم يكون في نتيجة و فعل

اسف اني طولت عليك..و لكن انا برده للاسف من ضمن اولاد بهية اللي بيجدوا متنفس ليهم في المدونات و خاصة هنا..و بدعي ربنا الحل يكون قريب و ترجع بهية لاولادها و اولاد اولادها

غير معرف يقول...

الأخ العزيز / إبن بهية
بعد التحية
قدأختلف معك في بعض التفاصيل ولكنني أتفق معك في الخط العام للمقال ، لك خالص التحية والإعزاز ، ولأمنا بهية أقول أما زلتي محروسة? ، أم أنك بت محروسة بالغربان .
ونرجوا أن تتفضل بزيارة مدونتنا
tadwenati.blogspot.com

micheal mohsen يقول...

7aga msh ghareeb wala gdeeda 3ala el nezam..walahy shobeer dah byfakrny gedan b radwan el komy f mosalsel el hilaly..kan 3ala addo w fag2a wesl bsore3t el saroo5..w 3ala el 3moom..7afkrkom en shobeer 7ykoon wazeer f 3ahd gimy w ma3ah uncle 3zooz bta3 el 7adeed

IBN BAHYA - إبــن بهيـــــــــــــة يقول...

إخواني الأعزاء .. شكراً .. شكرا لأخي الكريم ميجو ميجو وياسر وميشيل محسن وعنتر شايل سيفه قريباً بإذن الله بعد أن يجده .. أو بالأحرى ينتزعه من أيدي اللصوص .. أشكركم جداً على حضوركم الكريم وعلى مشاركتكم الطيبة هنا واسمحوا لي بالرد ..
بداية ليس بيننا أي خلاف في الرأي لا من حيث المضمون أو حتى الشكل .. أتفق معكم على أن شوشو حارس مرمى الحزن الوطني ليس فريداً في صنفه .. لا طبعاً هو مجرد مسخ للآلاف ممن سبقوه في تلك المهنة الوضيعه (قرني النظام) لكن الفارق أن كل قرنيات النظام كانوا في الصحافة المقروءة وقليل منهم كان في التليفزيون كالمحاور المتعوس مفيد فوزي مثلاً .. لكن طلة شوشو غير يا جماعه .. شوشو بيطل علينا من شباك الشباب والكورة وحضراتكم عارفين قد إيه الشباب عندنا مجنون كوره .. يعني نسبة المشاهدة عند مفيد فوزي لا يمكن أن تصل إلى 5% من نسبة المشاهدة عند شوشو بتاع الكورة .. وكلهم تقريبا من الشباب صح ؟ هذه نقطة ، وأما النقطة الثانية الخطيرة هي تبنيه لأفكار لجنة المحروس سياسات جيمي سوزان وترويجه لها .. وهي أفكار في مجملها هدامة للمجتمع وللأمة بأسرها ... يعني لما ييجي يكرهك عيني عينك كده في كل جنس العرب والمسلمين اللي حواليك يبقى لمصلحة مين ؟؟؟ هو ده الاختلاف بين شوشو وغيره .. إنه بيخاطب شريحة كبيرة من الشباب .. بيزرع فيهم أفكار غريبة .. بيروج ويبيع لهم فكر لجنة سياسات المحروس ..

كلامك يا أخي الكريم ميجو ميجو عن التحالف بين كل التيارات صحيح وضروري وحيوي في هذه المرحلة وأنا معك تماماً باستثناء وحيد وهو أن وجود الليبراليين المستغربين من بتوع التقارير لبره بره دول مش مفيد أبداً لقضيتنا لأنهم ببلاهة يعطون أسياد مبارك الواطي كل المعلومات التي تمكنهم من حماية مبارك ونظامه الفاسد .. يعني حضراتكم أكيد متفقين معي في أن المرحلة الأخيرة كانت مسيرة بأصابع من الخارج تحرك مبارك ونظامه كقطع الشطرنج حماية لها من الجماهير الغاضبة وحفاظاً على ذلك النظام القذر (نظامهم .. فهم من أتى بمبارك إلى الحكم ولسنا نحن) .. طبعا هناك ليبراليين محترمين مش بتوع تقارير وهؤلاء تجدهم بلا ريب مع الإخوان والاشتراكيين .. مع الشعب ..

أخي عنتر لا أختلف معك مطلقاً في أن مصر مرت بعصور أقبح من ذلك العصر ولكنك تتفق معي بكل تأكيد على أن هذا ليس مبرراً لتمادي ذلك الواطي في الطغيان هو وعائلته وعصاباته .. فقد عاشت مصر عصر الخطاطيف الذي كان الناس يختبئون في أسطح المنازل ويلقون بخطاطيفهم لاصطياد أي بني آدم معدي لكي يسدوا رمقهم بعد أن محيت من على وجه الأرض كل الحيوانات والكلاب والقطط وحتى الفئران .. طبعا نحن لم نصل بعد إلى ذلك ولكننا في الطريق وفقاً لتصريحات مبارك الواطي في خطابه الأخير (يا ليته يون الأخير بحق) ، وأما ما تحدثت عنه فيما ينقص أولاد بهية فأقول لك أن أولاد بهية لا ينقصهم شيء غير التنظيم والثقة بالنفس أكثر وسترى منهم العجب... وأما سيفك ، فحتما ستنتزعه يوماً ما من أيدي الجبابرة وستضرب به بإذن اله كل جبار عتل مصاص دماء .. كلي يقين من هذا يا أخي .. نهاية ذلك النظام البغيض أضحت قاب قوسين وهو الآن يترنح متخفياً خلف حفنة شعارات قديمة جوفاء بلا معنى .. محتمياً بجحافل الأمن من بوبيهات الحماية ..

أما حديثك عن المدونات لا أوافق عليه بصورة كاملة على الأقل .. فمازال أمام أولاد بهية بعض الوقت ليكونوا ملايين المدونات .. ولا تخف من كونهم ربما نفثوا غضبهم فيها مما سيؤدي إلى إهمالهم جوانب المقاومة الأخرى للنظام المستبد .. المدونات في رأيي ستغذي حالة الكراهية لذلك النظام القميء ولا يمكن أن تكون هي الثقب الذي يقي النظام من الانفجار كما يتمنون .. كن ذلك صحيحاً في كاريكاتير مصطفى حسين وفهامة أحمد رجب التي كانتا تخضعان لحفص من النظام قبل النشر ، لكن المدونات لا رقيب عليها غير ضمائر أصحابها مما يعطيها الفضل بإذن الله في إيقاظ كافة فئات الشعب المقهور ليطالب بحقوقه من قوى الشر والبغي واللصوصية والخيانة والعمالة التي يقودها القواد الأكبر في المنطقة حسني مبارك الواطي ..
في الأخير أشكركم جميعاً وأطيب أمنياتي لكم ولمصرنا الحبيبة بالخلاص القريب .. ربنا يوفقكم يا أولاد بهية .. يا رب

غير معرف يقول...

السلام عليكم

و الله يا استاذي الفاضل ابن بهية انا ما عارف اقولك ايه...والله انا مصدوم حتة صدمة...انا يا سيدي الفاضل متابع للمدونات كلها...و بعلق علي المحترم منها امثال مدونتك و للاسف مدونة وائل عباس..الوعي المصري..انا دائما ما ابدأ كلامي بالسلام علي من اتبع الهدي...هل في هذا عيب...هل في هذا جرم..ادخل علي مدونة الوعي المصري و شوف الاخ وائل رادد عليا ازاي...تريقة و شتيمة و تجريح..انا اللي بفرح ليه لما بيكتب اي موضوع و يجيب نتيجة و لا لما بنتصر علي اي حد من اتباع النظام بهنيه علي مدونته...ساب كل اللي انا كاتبه و كل اللي الناس كاتباه و نزل تجريح في و اتهمني اني نفسي اروح تل ابيب و اني باتبع شيوخ السعودية و كلام غريب كدة...و هو مدونته بيطلع عليها الاف القراء و انا منهم...تخيل لما انا الاقي الرد دة مكتوب عني ...هل معقول يبقي هو دة وائل نموذج للمناضل او المعارض اللي مصر مستنياه و مستنيا امثاله علشان يخلصوها من اللي هيا فيه...هل لما واحد زي وائل عباس اللي بيطلع في العاشرة مساءا و في قنوات تانية كتير يرد عليا بالاسلوب دة امام الناس دي كلها يبقي هو دة الصح..لما يعيب فيا و في البيت اللي انا جاي منه يبقي هو دة الاتحاد و التوحد اللي احنا بندور عليه...هو دة الهدف اللي وائل حاطه امامة...ولا مجرد بس الشهرة و انو يكون ليه مدونة و الناس تتكلم عليه...لما يسيب المواضيع اللي الناس كاتباها و يركز علي حاجة بالتفاهه دى و يرد و يشتم يبقي هو دة اللي من المنتظر يكون من الشباب اللي الواحد كان بيتمناها يكون في منصب كويس...اتخيل لو حصل و بقي وائل في منصب قيادي مثلا و دة بصراحة ما كنت اتمناه قبل ما اقرا الرد بتاعه...هتكون هي دي طريقة حكمه و تقييمه للناس..هي دي يا استاذ ابن بهية النوعية اللي حضرتك و انا و غيرنا مستنيين انها تقوم و احنا نقوم وراها..هي دي الناس اللي انت بتقول عليها اولاد بهيه...اولاد بهية عمرهم ما كانوا بيجرحوا و لا يشتموا و لا يسبوا ناس لا عمرهم شافوهم و لا عرفوهم...والله لا تتخيل مدي الصدمة اللي انا فيها..مش عشان هو شتمني و لكن علي المفاجاة...لما تكون راسم صورة في مخيلتك لشخص ما و لمستقبل ما و تفاجا ان كل حاجة غير ما كان الواحد متوقعها نهائيا....ستكون مصيبة والله شديدة ...ان نتمني زوال اشخاص بعينهم و نسعي لذلك و نأمل في غيرهم ...و نفاجا بان من جاؤوا ليسو بمختلفين عمن ذهبوا..ساعتها ستكون الطامة الكبري والله لو كانت العملية كلها اطماع و تتطلعات فردية فقط

انا فعلا حزين و مصدوم والله

IBN BAHYA - إبــن بهيـــــــــــــة يقول...

أخي الكريم عنتر اللي هيلاقي سيفه قريب أوي بإذن الله .. ما تزعلش الموضوع بسيط جدا .. أنت تقول السلام على من اتبع الهدى .. طيب اللي اتبع الهدى مش هيزعل لأنك بتحييه لكن اللي مش متبع الهدى ومتبع هواه أو الشيطان هو اللي حيزعل .. شفت ازاي انها بسيطة؟؟؟ ثم من قال لك يا أخي الكريم أننا في انتظار المخلص وائل عباس ولا غيره عشان يخلصنا ؟؟؟ يا راجل صلي على النبي وبلاش حساسية كبيره كده .. وائل ما اعرفهوش خالص ولا عمري سمعت بيه لكن لو هو بالشكل ده يبقى مش عايز أعرفه من أساسه .. بس مش دي الناس القدوة يا عنتر يا حبيبي .. ولو رجعت لردي السابق الذي ذكرت لك فيه أنني متحد مع الجميع في مواجهة الطاغية حسني مبارك الواطي استثنيت مجموعة مش ممكن أتحد معاهم إلى يوم الدين وهم ذيول المستعمر الغربي ومن سار خلفهم بعلم أو حتى بجهل .. أظن فيه كتير ماشيين وراهم بجهل شديد جدا جدا زي اللي انته بتتكلم عنه .. ريح دماغك من العيال الصغيرة دي .. فيه الآلاف من المدونين المحترمين جدا وقلة بسيطة من الأغبياء .. سيبك منهم .. وفقك الله

غير معرف يقول...

السلام عليكم

لا يسعنى بحق الا ان اقول...الكبير كبير...و المحترم محترم...لك جزيل الشكر يا استاذنا ابن بهية

غير معرف يقول...

السلام عليكم

استاذ ابن بهية...انا صاحب التعليق السابق...اسف علي النسيان

غير معرف يقول...

to mr. Antar (without his sawrd)
Assalamo alikom WRAB. First of all, do not be upset from the response of Wael abbas.But I would like to tell u that this greeting should be said only on those who disbelive with our prophet (saaw), (non-moslems). So u must greet us with ASSALAM ALIKOM.
I really admired with ur politness response and behavior, which indictaes that u r indeed good educated and well bred up.

غير معرف يقول...

المجتمع المصرى الجديد
كنت جالسا مع اصدقائى الذين احسهم دائما على المشاركة الايجابية فى الحياة السياسية والاجتماعية باعتبار ان ابناء جيلى هم المسئولون الان على رفع الراية وقيادة الامة من وجهة نظرى الشخصية وتطرق بنا الحديث عن المجتمع المصرى والذى تبدل حاله منذ خمسة عشر سنة تحولت القيم والمفاهيم والمبادىء الى موضة قديمة ورجعية وتخلف وحل محلها نظريات ومبادىء اخرى جديده ان الرجعية والتخلف يا سادة هى اول اتهام سنتهم به ولكن الحقيقة اننا لسنا رجعيين للتمسك بمبادئنا والدليل ان الاوروبيين المتحضون الذين ننظر اليهم انهم ناس متقدمين مايزالون يحتفظون بمبادئ وقيم قديم منذ عصورهم الوسطى عموما هذا ليس موضوعنا الموضوع الان نسيج الشعب المصرى الذى كان له صفات كثيرة تزيده جمالا
تعالوا نعقد مقارنة بسيطة بين الماضى الجميل والحاضر المر
على خلفية الاحداث السياسية والمشاركات الوطنية اصثبح المصريون بعد ان كانوا منذ ثورة 1919 يختارون نوابهم واحزابهم السياسية بكل قوة واصرار تحول الامر الى تجارة الاصوات الانتخابية حيث وصل الصوت الى سعر 1500جنية يعنى لو انت اب لعدد 2 اولاد مهاهم بطاقات انتخابية مشوار للجنة الانتخابية وهتعملك حوالى 3000 او 4000 جنية فى السريع وقتى يا معلم دى الناس اللى كانت بتنتخب سعد باشا والنحاس وقدمت عظماء الساسة فى القرن الماضى لا طبعا دول ناس غيرهم
على المستوى الاقتصادى والله على ايامنا وانا مواليد السبعينات كان المجتمع المصرى فى حاجة اسمها طبقة متوسطة والطبقة دى كانت بتمثل حوالى 40% من المجتمع وكاان فيه حوالى 40 % طبقة فقيرة و20 % طبقة غنية مع الاسف الان اصبح تكوين المجتمع المصرى 30 % طبقة غنية جدا 70 % طبقة فقيرة جا راحت فين الطبقة المتوسطة الله اعلم
الناحية الاجتماعية حدث ولا حرج مشاكل الطلاق والزواج الغير شرعى بقت اكتر من حلقات مسلسلات التليفزيون المبادىء اختفت اصيب البعض بامراض اجتماعية خطيرة كان آخرها السعار الجنسى الذى حدث بوسط العاصمة
عموما الكلام كتير والدردشة اخدتنى انا واصحابى لحد ما ابتدينا نتناقش فى الحلول واتدينا نفكرلا ايه اللى ممكن يتعمل والله انا لاقيت اراء وكلام جميل هنشره المقال اللى جاى
اخيرا اود ان اوجه الشكر والاحترام والتبجيل الى الاخ العزيز ابن بهية والاستاذ الفاضل عنتر مش لاقى سيفه .
ملحوظة اليوم هو اول ايامى مع مدونتى وهذا اول مقال ينشر لى
رئيس تحرير
mego_mego

غير معرف يقول...

السلام عليكم و رحمة الله

الاستاذ ميجو-ميجو

مقال محترم زي اللي كاتبه بالظبط..و الحديث يا سيدى ممكن ان يأخذ منك سنوات و ليس عدة مقالات لو حاولت المقارنة بين الماضي و الحاضر ...ملايين من نقاط المقارنة ستدور برأسك و الاف من الاختلافات...و لكني اعتقد انه يمكن تلخيص كل المقارنات في كلمة واحدة....الحال اتشقلب...اي منطق و اي وسيلة و اي ضمير و اي اسلوب و اخلاق و تعامل و طباع و اهداف و قيم كله تحول 180 درجة بالتمام و الكمال...هذا ما ستتوصل اليه في نهاية المقارنة

بالمناسبة...اجمل التهاني بصدور مدونتك الجديدة...برجاء وضع اللنك الخاص بها...طبعا بعد استئذان الاستاذ ابن بهية...حتي يتاح لنا الدخول و الاطلاع...فأكيد هي مدونة محترمة و هذا اصبح نادرا وسط العبث الموجود حاليا...خالص تحياتي

الاستاذ ابن بهيه...طال غيابك منذ اخر تعليق...لعل المانع خير..

IBN BAHYA - إبــن بهيـــــــــــــة يقول...

أخي العزيز عنتر اللي هيلاقي سيفه قريباً بإذن الله وأخي ميجو ميجو وكل أحبائي المحترمين اللي شرفوني بزيارتهم لمدونتي المتواضعه .. أهلا بكم وأسعدتني جداً تعليقاتكم برغم ما بها من أحزان .. سعيد بس إنكم جيتوا يعني .. وأما المقارنات أخي ميجو فكما قال لك أخونا عنتر تطول وتطول .. لكن اسمح لي هنا فقط أن أعلق على الطبقة المتوسطه .. أخي الكريم .. لا يخفى عليك أن الطبقة المتوسطه في أي مجتمع تمثل العمود الفقري له .. وهي كانت عندنا من قبل بنسبة أكبر مما ذكرت .. وبدأت تتآكل بسبب القطبية الرهيبة التي أحدثها نظام مبارك الواطي الصهيوني ما بين فوق وتحت .. طبعا اللي فوق بيجروا لفوق بعيد عن الوسط وبيزيدوا ثراء والغلابه اللي تحت ما لهمش أمل في الطلوع وساكتين .. تيجي للي في النص .. البعض منهم حاول يتشعلق في رجلين اللي طالعين لفوق وبعضهم قدر يركب القرنين بصعوبه ويمسك في تلابيب الناس اللي طالعه وطلع والبعض حاول تركيب القرنين وفشل والبعض الثالث مش سائل أصلا .. شويه شويه تقلصت الطبقة المتوسطه وهي في طريقها للزوال وبقى عندنا يا تحت يا فوق .. وبتفقد بهية كل يوم فقره من عامودها الفقري .. عشان كده وسطها بقى سايب والخوف أحسن تطب مننا مشلوله .. ربك يستر يا ميجو .. ولا إيه يا عزيزي عنتر؟
أرق تحياتي

غير معرف يقول...

السلام عليكم و رحمه الله و بركاته

ياااه يا استاذ ميجو و يا استاذ ابن بهية...لسا بتتكلموا عن الطبقة المتوسطة...هي فين دي و فين ايامها...راحت عليها خلاص..كلف بقة يا فوق يا تحت...و ياريته بمزاجه..دة اصبح اجباري...لا مجال للوسطية خلاص..علي راي المثل ..انت معانا و لا مع التانيين...و هي يا استاذ ابن بهية مصر لسا هاتفقد فقرات من عمودها الفقري..اعتقد ان ما تبقي من فقرات هي الفقرات الغنائية و الاستعراضية فقط..اما الفقرات العلمية و الرياضية و الصحية و التعليمية فخلاااص...كلها دابت و تهتكت...انا بحكم عملي كثير التجوال بين بلاد الله..كل شوية في بلد شكل...والله يا جماعة لو تشوفوا المصريين برة عاملين ازاي..سيبكوا من اللي بيقول انهم بيتزلوا و يتمرمطوا...لو حد بيحصلوا كدة بيبقي هم السبب لانه بيهين نفسه بنفسه عشان القرش...انما المصري المحترم..اللي كان في يوم من الايام عصب العمود الفقري عند بهية...تجده في ارقي و احسن المراكز و المناصب..و باحصائية كنت قرأتها من قبل...فبنسنة 97,6 بالمية من هؤلاء النوابغ من الطبقة المتوسطة...لان لا الفقير بيستطيع الحصول علي ما يؤهله للعمل و المنافسة بالخارج...بالرغم من مجانية التعليم!!!!...ولا الغني بتبقي فارقة معاة مراكز..عشان كدة هما ركزوا في البلد دى علي طحن الطبقة الوسطى و اخراجها باي صورة خارج البلد...و هذا ما يتجلي واضحا في كل تصرفات الحكومة...تجدها مهتمه جدا بمن تسميهم محدودي الدخل و الطبقة الكادحة و المواطن المطحون...و ايضا تهتم جدا بطبقة رجال الاعمال..زي اللي جابتهم الوزارة...تجد كل القوانين اما زيادة لا تذكر في المرتبات و العلاوات عشان الغلابة يعني...و اما يقولك قوانين استثمار و جذب رؤوس الاموال و تسهيل العقبات اما رجال الاعمال...طب فين بقة القوانين الخاصة بابناء الطبقة الوسطي اذا كان ليها لسة ابناء...فين القوانين الخاصة بالمهندسين و الاطباء و المعلمين ...تجدها قليلة تكاد تكون تنعدم...و هذا عن قصد و نية مبيتة...حتي يجعلوا الناس تشعر ان البلد كلها غلابة و رجال اعمال...و دة كله ليه...عشان البقة المتوسطة هي الطبقة الوحيدة اللي بتقول لأ...هي الطبقة الوحيدة اللي بتعارض و تعترض...عشان كدة مش عايزينها...تجد رجال اعمال شباب و صغار السن و اعضاء مجلس شعب و وزراء...وبالطبع تجد غلابة من الشباب...انما تجد ممثلين عن الطبقة المتوسطة من الشباب...ابدا...كل معارضي الاحزاب و نواب المجلس سواء اخوان او غيرهم هم من كبار السن الذين يصعب عليهم ترك البلد...فهم باقون بحكم الظروف و الارتباطات...انما تلاقي شباب زي الورد كدة من بتوع الطبقة المتوسطة...ابدا...ليه...مش عايزين دوشة...البهوات الكبار مش عايزين وجع دماغ...البلد بقيت غلابة و رجال اعمال...و علي الشباب..قرة عين البلد...السلام

IBN BAHYA - إبــن بهيـــــــــــــة يقول...

شكرا أخي عنتر على الرد ولا أعتقد أننا نختلف معك لا أنا ولا أخي ميجو .. لكني وميجو عايزين نخلي فيها حتة أمل ولو إنه شبه معدوم .. لكن لازم يكون فيه أمل يا أخ عنتر الحبيب وأعتقد أن هذا الأمل البسيط هو ما يجعلك تجاهد من أجل إيجاد سيفك أو انتزاعه من أيدي اللصوص .. بس الأمل فينا وفي شعبنا الطيب وليس أملاص في اللصوص بالطبع .. أعتقد أنك تفهمني .. مش كده ؟؟ لك مني كل تحية وتقدير