10 يناير 2007

صباح الخير على الورد اللي فتح في جناين مصر

صباح الخير على الورد اللي فتح في جناين مصر
صباح العندليب يشدي بألحان السبوع يا مصر
صباح الداية واللفة ورش الملح في الزفة
صباح يطلع بأعلامنا من القلعة لباب النصر

ر((ربنا يخليك يا عم أحمد ويخزي شيطاني .. مش عارف ليه بقالي كام يوم كل ما أكتب أو أقول إسم عمي الحبيب الفاجومي ييجي على لساني عبارة الله يرحمه .. ربنا يرحمنا جميعا .. ويخزي شيطاني ويطول في عمر بغبغان مصر أحمد فؤاد نجم .. يمكن من فرط حبي ليه وخوفي عليه .. ربنا يخليه))ر

صحيح يا عم أحمد صباح الخير على الورد اللي فتح في جناين مصر.. وعاشوا بناتك يا مصر .. عاشت نهى الزيني .. عاشت سهير ، سوسن ، وفاتن .. عشتن يا بنات بهيه .. بهيه المسكينة اللي ولادها يا عين أمهم تعبانين .. شقيانين .. عيانين .. عدمانين .. مقهورين .. و يأبى رحم بهيه إلا أن يقذف الطغاة الذين تجبروا على ولادها .. ببنات بهيه .. ريحوا أنتم شويه يا ولادي .. خدوا نفسكم .. ليتسلمن منكم الراية بناتي الشريفات العفيفات العظيمات الشامخات .. أصولهن ثابتة بعمق سبع تلاف سنه وأكتر وفروعهن في أعالي السماوات ..

ده الورد الحقيقي يا سي فاروق حسني .. وده الورد اللي ينباس .. ويترفع فوق الراس .. ولسن معاقات ذهنيا يا سيد حسين فهمي برغم ارتدائهن الحجاب .. يا ريت واحد منكم يورينا هو قدم إيه لبهيه يا سي فاروق ويا سي سحس فهمي؟!

أما أنت يا بهيه .. فافرحي خالص .. خالص يا بهيه .. يا سعدك ببناتك .. وولادك .. ربي يحرسهم ليكي ويصونهم ويحميهم .. تسلموا يا حبات عيون بهيه وعيوني .. وتسلم بهيه ..


سلامتك يما يا مهرة
يا حبالة يا ولادة
يا ست الكل يا طاهرة
سلامتك من آلام الحيض
و م الحرمان وم القهرة
سلامة نهدك المرضع
سلامة بطنك الخضرة
هناك وفرخة الوالدة
تضم الولد يا والدة
يصونهم لك ويحمينهم
يكترهم يخليهم
يجمع شملهم ليكي
يتمم فرحتك بهم


يا رب تمم فرحة بهيه ببناتها وولادها ووصلهم لبر الأمان بالتخلص من الواطي مبارك وعصاباته القذرة المعششه في خرابة الحزن الوطني وعصابات إبنه القذر في لجنة الوكوسات

هناك 16 تعليقًا:

غير معرف يقول...

بجد ألف صباح خير على بهيه وبنات وولاد بهيه .. أنا زيك فرحانه أوي يا بن بهيه ببناتها العظيمات .. أكيد انته قرأت المصري اليوم وعشان كده كتبت الكلام ده النهارده
شكرا

micheal يقول...

صباح الخير علي بهية و أولادها المخلصين كلهم بس قولي هو فية حاجة جديدة حصلت من بنات بهية علشان أنا حاسس أن فية حاجة مفرحاك..يا رب يكون ظني في محلة
لك أرق تحياتي

غير معرف يقول...

السلام عليكم
صباحكم خير وورد..
جميلة جداً تلك المشاركة..

سلامتك يامة يابهية
يامصرية ياشرقية
يا أجمل ست عربية
بحبك بس زعلانة..ومتضايقة
لأنك يامة هملانا ..وموش طايقة
تضمينا وتحمينا ..
من الشوك اللى فى أدينا
دموعك دم جارحنا..
وفقرك هم طافحنا
وإمتى نفوق ونتقابل
يا ست الكل..
على الطبلية نتحاور ..
وعند الساقية نتشاور
ونزرع فيكى شجراية وضليلة
وياسمينة وفلاية وياحليلة
ونرجع نترمى ف حضنك
وننسى الآهة فى بعدك
وطول الصبر..
بحبك إنتى وعيالك يا أحلى مصر..

IBN BAHYA - إبــن بهيـــــــــــــة يقول...

أهلا إخوتي الأعزاء .. أهلا ولاد بهيه الطيبين .. وشكرا على الزيارة والتعليق


Anonymous
شكرا على الزيارة والتعليق الجميل ده .. بجد ربنا يخليكي ويخلي بهيه وولادها الطيبين
أرق تحياتي
============================
micheal

أهلا مايكل .. كلامك صحيح بالنسبة لي أنا بس .. لا جديد غير أنني قرأت موضوعا بالأمس في الصحف عن العظيمة سهير الشرقاوي وما تعانيه منذ فترة طويلة من اضطهاد بسبب شرفها وعدم موالستها على الفساد في وزارة الصحة الاستثمارية ومشعرت في كلامها بكم كبير من الخوف على إبنيها وبيتها .. ربنا معاها ومع كل مصري شريف
أرق تحياتي

============================

د/حنان فاروق

شكرا للزيارة .. إيه الكلام الجامد ده .. الله يحفظك ويحفظ ولاد بهيه .. أحلى بقعه في الكون .. بحواريها ومجاريها .. هي عندي وعندك يا بنت بهيه جنة الله في أرضه .. كلماتك جميله .. بالتوفيق
أرق تحياتي

غير معرف يقول...

البداية:18/01/2007 - 15:00
النهاية:18/01/2007 - 17:00
في الذكرى الثلاثين لإنتفاضة الخبز 18-19 يناير 1977 تدعو الحركة المصرية من أجل التغيير (كفاية)نشطائها وكل القوى السياسية

الى مظاهرة يوم 18-1-2007 الساعةالثالثة ظهرا امام مسجد السيدة زينب ضد غلاء الأسعاروتضامنا مع الحركة الإحتجاجية الجماهيريةلعمال مصر طوال شهر ديسمبر الماضى .
تقويم

Tamer Nabil Moussa يقول...

صباح الفل ياريس


وربنا يخلية ويكتب ويبدع لينا احلى الاشعار


تحياتى

IBN BAHYA - إبــن بهيـــــــــــــة يقول...

إخواني الأعزاء .. شكرا على الزيارة والتعليق

سـردية

كلنا معاك .. وشكرا على التذكير

tamer

صح يا تامر .. يا رب يخليه ويشوف مصر محرره معانا قريبا يا رب

شكرا على موضوع الخنازير في مدونتك .. ده برضه يصف حال البلد واللي بيحكمها .. لما شوية خنازير يبقوا أولى من ثمانين مليون بني آدم

أرق تحياتي

maf2ou3a يقول...

eh el rou2an dah??
glad to always see u in this mood

واحد من الناس يقول...

مصر يا امة يا بهية
يام طرحة و جلابية
الزمن شاب و انتي شابة
هو رايح و انتي جاية
جايه فوق الصعب ماشية
فات عليكي ليل و مية
و احتمالك هو هو
و ابتسامتك هي هي
تضحكي للصبح يصبح
بعد ليلة و مغربية
تطلع الشمس تلاقيكي
معجبانية و صبية
يا بهية

الزعيـمة يقول...

صباح العزة والكرامة على كل ابناء وبنات مصر الحتفضل بالخير ولاده

نفس المفرحك مفرحني يا ابن بهية
وفرحانة كمان بعيد ميلاد زعيمنا

كل سنة والجميع طيب
زي بكرة اتولد القمر

smraa alnil يقول...

مصر السما الفزدقي وعصافير معدية
والقلة مملية ع الشباك .. مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر

مش عارفة ليه افتكرت البيتين دول وانت بتتكلم عن بهية
بهيتي هي مصر
بجد ربنا ينصرها ويحافظ علي ولادها وبيتها
موضوع رائع يا ابن بهية
وربنا ينصرنا يارب

IBN BAHYA - إبــن بهيـــــــــــــة يقول...

شكرا إخواني ألأعزاء على الزيارة والتعليقات ..

maf2ou3a

شكرا .. الله يحفظك ويخليكي ويروق دنيتك إنتي وبهيه بزوال مبارك وعصاباته من الدنيا ديه .. بجد فرحان ببنات بهيه اللي مشرفينها ..
أرق تحياتي

=================

واحد من الناس
ربنا يخليك ويخلي بهيه .. أحلى سلام وتحيه ليك ولبهيه .. ما هي هيصة شعر بقى ..
أرق تحياتي

=================

الزعيمه
دايما زعيمه .. الله يحفظك ويخليكي ويخلي كل بنات وولاد بهيه الطيبين الحلوين الجدعان .. وكل سنه وأنتي والجميع بخير .. ويا رب الليله يتولد فينا زعيم جديد يعوض اللي راح ويجيب لبهيه ألف إيد .. تنزل على قفا الواطي وعصاباته الأنذال .. ربنا يخليكي يا زعيمه ..
أرق تحياتي

=================

smraa alnil

الله يخليكي يا أجدع بنات بهيه .. بجد كل بناتها شموس وقمرات ماليه سماها شرف وعظمه .. الله يحفظك ويخليكي وفرح بهيه بيكي .. وألف ألف شكر على الأبيات الجميله دي اللي بتفوح بعبير بيرم وجاهين وعمنا الفاجومي ..
أرق تحياتي ..

el2ahwagi يقول...

Saba7 elkheer le ibn baheya w banaat baheya...!!

IBN BAHYA - إبــن بهيـــــــــــــة يقول...

أخي الكريم
yasser
الله يفرحك دايما
أشكر مشاعرك الجميله .. كلنا والله فرحنا ببنات بهيه الجدعان .. ربنا يحرسهن ويحميهن

قال زعلانين من نون النسوة ؟ دي عالم هبله .. ييجوا يشوفوها في بنات بهيه .. بالحجاب والطرحه والجالابيه أهو .. ومن غير إعاقة ذهنية يا معاق نفسياً منك له (ريري وسحس طبعا) حد غيرهم؟
هم دول أشباه الرجال يا ياسر .. ربنا يحفظ ولاد وبنات بهيه من إعاقاتهم الثقافية

أخي
el2ahwagi

الف صباح خير عليك .. وألف شكر أخي الكريم .. ربنا يحفظك

أرق تحياتي للجميع

إبـراهيم ... يقول...

طيب ، أنا قلت أعدي أسلم عليك

وعلى عمنا فؤاد برضك



جميل يا ابن مصر
يا ابن بهية

غير معرف يقول...

صباح العندليب يشدى بالحان السبوع يا مصر