25 فبراير 2007

هالة .. هالة .. دعارة أم عهر سياسي !؟

بداية أود التنبيه على أن النقاش في موضوع الإخوان السابق مازال مفتوحاً ويوجد كثير من الردود والتعليقات الجديرة بالمتابعة .. خالص تحياتي

هالة .. هالة .. دعارة أم عهر سياسي !؟

ألم تلاحظوا معي حجم الهالة الكبير جداً الذي يحيط بأزمة هالة سرحان ؟ ألم نسأل أنفسنا لماذا كل هذا الزخم الإعلامي الزائد والزائد جداً عن كل الحدود ؟ لماذا كل ذلك ؟ هل غيرة على سمعة مصر كما يدعون ؟ هل غيرة على شرف المهنة كما يتشدق البعض ؟ هل غيرة على قيم المجتمع الذي ندعي وحدنا أنه محافظ ؟ لا يكاد يمر يوم إلا وتقرأ وتسمع وتشاهد هالة سرحان متربعة على جدول أعمال كل القنوات والمحطات والصحف والمجلات وكأن جميع مشكلاتنا وإشكالاتنا قد حلت ولم يبقي إلا موضوع هالة سرحان معلقاً ومعطلاً لمسيرة تقدمنا ، وهو في رأيي ليس شاهداً على تخلفنا فقط ولكن على حجم الضنك الثقافي الذي هوينا إليه ، هو صورة بالأشعة لجسد أمة مليء بالأسقام التي لا يؤمل شفائها على المدى القريب مع كثير من التفاؤل وهذا أمر طبيعي في أجساد أمم الأرض كافة وليس نحن فقط حتى لا يحشرنا السوداويون في حارة جلد الذات.

لماذا كل ذلك العته الذي نعيشه ؟ هل هو صدفة أم أنه نتاج خطة مدبرة وفخ منصوب لهذه الإعلامية منذ فترة وسقطت فيه بكل عبط برغم ما تدعيه من ذكاء وألمعية تتكبر وتتسلط بهما على المجتمع ورموزه وثوابته الثقافية والاجتماعية منذ بدأت تتلمس خطواتها الأولى على بلاط صاحبة الجلالة سابقاً ؟ إن كان فخاً فمن نصبه لها أو لقناتها أو لكليهما ؟ وماذا يمكن أن يجني من وراء ذلك ؟

بداية أود تسجيل حقيقة هامة مؤداها ، أنني لا أكره المذيعة هالة سرحان فقط ولكنني أمقت طريقتها الفجة في تناول الموضوعات موجهة بنادقها إلى قلب ثوابتنا الأخلاقية ولا ندري من يحشو لها تلك البنادق ، وأمقت حرصها الزائد على مراعاة الاختلاف بالمخالفة لكل قيمة في مجتمعنا وليس بالتميز المهني المحمود الذي ربما لو حرصت عليه منذ البداية لكان أوصلها إلى نجاحات أبعد مما وصلت إليه من علو دخاني كريه يزكم الأنوف ويكتم الأنفاس ، ورأيي الشخصي في تلك المذيعة اللامعة في عيون المراهقين فقط بما تقدم من عري إعلامي هو أنها مجرد مدعية دخلت إلى عالم الإعلام بواسطات عائلية كثيرة يعلمها الجميع ، ودفعها غرورها إلى استلام المقود لتثبت لمن أوصلها إلى السلم أنها قادرة بدونه على الصعود وحدها فنزعت إلى ارتياد الطرق الشائكة ، وإمعاناً في إثبات قوتها الزائفة آثرت السير عارية لاستفزاز الجميع كي يتجردوا مثلها من كل فضيلة ، فكرهها البعض وحقد عليها البعض ممن يخافون لسعات البرد.

لكن تلك الكراهية لا تعطنا الحق في ذبحها والجلوس يومياً على الموائد الفضائية بغرض المزمزة بدمها ومصمصة عظامها بدم بارد من أناس أمنت لهم الشعوب واستأمنتهم على مستقبلها بوصفهم مثقفين ننتظر منهم قيادة نهضتنا وتحريرنا من قيود التخلف والاستعباد والقهر ، فإن كان هذا حالهم الذي نراه فهل يمكن أن نأمل فيهم خيراً لهذه الأوطان وبخاصة أن جلهم يعلم يقيناً بأن الجنازة حارة والميت كلب ؟ ولكن هناك من يريد لهذه الجنازة أن يعلو صوتها ويطول مكوثها على مائدة الإعلام شهوراً ، وهم معروفون للجميع ولا أحد يجرؤ على الاقتراب منهم حفاظاً على لقمة القاضي التي استبدلوا بها العيش الحلال كبقية بني جلدتهم الجوعى ، فلم يربط أحد بين رغبة هالة سرحان لاستقطاب الممثل عادل إمام من شركة (جود نيوز) كي يعمل لصالح شركة روتانا وبين أصحاب (جود نيوز) ولجنة وكوسات الحزن الوطني برئاسة ولي عهد الجمهورية المصرية ، ليس هذا فقط ولكن لم يجرؤ أحد على الربط بين ما حدث لهالة سرحان وما ذكر في برنامجها من إشارات واضحة حول تعاون ضباط الشرطة مع بنات الليل وهو الأمر الذي كان مطروحاً في البداية على قناة المحور قبل أن تصدر الأوامر من شرم الشيخ إلى سما العريش بالتوقف عن الخوض في هذا الأمر ، فلم نر له ذكراً في الحلقات التالية من مسلسل مصمصة هالة سرحان.

إن كانوا حريصين على مصر وسمعة مصر كما يدعون فهم بألسنتهم دأبوا على بدء حديثهم (الأهطل) بعبارة أن مصر أكبر من أن ينال من سمعتها مليون برامج .. نحمد الله على اعترافكم ، ولكن أليس ما تقومون به هذا أكثر إيذاءً لسمعة مصر ؟ فلما كل ذاك العته ؟ يأتي آخر ليحدثك عن الكسل المهني ! وهو أمر لا رد عليه لأن هالة سرحان تحديداً أكثرهم نشاطاً وإن كنا نراه نشاطاً شيطانياً خرباً تعافه أنفسنا ، لكن الموضوعية تحتم علينا الاعتراف به من الناحية المهنية ، فجميعهم يفبرك ويقص ويلصق ويأتي من الموبقات المهنية ما لا يتسع المجال لذكره ، و لا يمكن أن يكون ذلك من قبيل الغيرة العامة على المجتمع وقيمه كما يذهب البعض ؟ اسمحوا لنا هنا بوقفة .. فلسان حال هؤلاء يقول بأنهم آخر من نسمع منه حديثاً عن القيم والأخلاق والمثل ، إلا إذا كانوا يقصدون قيماً أخرى أتت مع تغيير المناهج الدراسية .. فليسامحوناً لأننا لم ندركها .. كبرنا ونجونا بعقولنا وقد يمنعنا الفقر من إلحاق أبنائنا بالمدارس (رب ضارة نافعة) .. إذن أين العلة ؟

إن الزواج الغير شرعي بين (البيزنس) والسياسة والذي اتفق الجميع على أنه زنا ودعارة هو من يقف وراء كل تلك الضجة المفتعلة حول هذه الجنازة التي نصبوها للدكتورة الخرقاء دون أي وازع من ضمير لدى اللاطمين البكائين على سمعة الوطن الذي يلتهمونه في كروشهم باوامر عليا حريصة على الفساد حرصها على كرسي الرئاسة ، فكلاما يعيشان في تآلف وتناغم وتبادل للمصالح ، ولولا الفساد ما بقي الكرسي ولولا الكرسي ما بقي الفساد .. حياة بعضها من بعض .. والطفيليات لا تعيش إلى على الجيف والرمم .. قدرك يا وطني أن تختنق بذلك العفن حتى يقضي الله أمراً كان مفعولا ..

قد يسأل أحدهم ، إن كان لدينا العقول القادرة على كل هذا الترتيب والتخطيط لاصطياد عدة عصافير بطلقة واحدة فما بالنا نتقهقر ونهوي كل يوم ؟ بضربة واحدة نشعل الحرائق للتشويش على المناقشات الموضوعية لشعوذات ولي عهد الجمهورية في الدستور والتشويش على كوارث جهاز أمن الرئيس وليس الدولة كما يدعون وفضائح التعذيب التي جابت الآفاق ، والتخلص من قناة ومذيعة قلت أدبها مع السادة حكام البلاد ، والظهور بمظهر حامي حما الفضيلة والأخلاق ، وربما أيضاً ضرب شركة روتانا لمصالح اقتصادية تتعلق بأصحاب روتانا و(جود نيوز) ورجال أعمال لجنة وكوسات الحزن الوطني ورئيسه وولي عهده الرجيم ، وأمير المشاريع القومية توشكى ، وأمور كثيرة مخفية حتى اللحظة. لماذا لا تعمل هذه العقول نحو الأمام ؟ الجواب بسيط جداً وهو أن تلك العقول هي لكائنات لا هوائية تحيا وتعمل وتنتعش في الظلام فقط .. الهواء النقي يقتلها والضوء يحرقها ، والعمل النهضوي إلى الأمام وقوده الهواء والنور .. لو أردنا تقدماً ونهضة فلابد من كشف تلك الجيف والرمم للهواء الطلق والنور ، كي يتمكن المواطنون الحقيقيون الذين يصنعون الكراسي ولا تصنعهم الكراسي من قيادة نهضتنا وعزتنا وتحررنا .. بس خلاص ..

هذه الجنازة الحارة التي استأجروا لها كل صبيان الحانوتي للطم والولولة والعويل وشق الجيوب وزرف الدموع على الفضيلة التي أراقتها هالة سرحان تعبر بصورة شديدة الوضوع عن معالم العصر العفن الذي نعيشه في كنف ذلك النظام البغيض ، وصولية حقيرة وتزوير للحقائق وتوجيه الاتهامات لمن غضب عليه النظام بشخصه أو من ينوب عنه من أحبابه خفافيش (البيزنس) وحراس فسادهم وأمنهم وليس أمن دولتنا كما يدعون جميعاً . والصورة شديدة الوضوح التي أعنيها هنا هي صورة المثقف المصري الكسيح الذي أحاله النظام الكريه إلى مجرد أرزقي .. شحات يتكفف اللقمة على موائد اللئام وأبواب الفضائيات والصحف ، صحيح أن أحداً لا يملي عليه كلمات ليرددها كذي قبل ، ولكن المثقف الشحات نمت له خلال الربع قرن الكارثي الماضي ((قروناً)) بات يستشعر بها اتجاهات الرزق ، وراح يجود من أدواته للسيطرة والتحكم في وانفعالاته كي يأتي إخراجه الفكري متفقاً ورؤية صاحب الصنبور ، وهذا هو الفارق الوحيد الضئيل جداً بين عهد حرية الرأي الذي نحياه كما يدعون وبين الذي سبقه ، في كلا العهدين تكميم وسد للأفواه كي لا تنطق بمكروه ، في السابق كانت الأفواه تكمم بالسجن فقط ، لكن اليوم تسد الأفواه بقطع (الجاتوه والشيكولاته) وإن أبت إلا الفقر فالسجن موجود مع الفقر والحرمان وكل البلايا.

إن ما نراه اليوم هو معركة في بيت العاهرات ، وكل واحدة تدعي الشرف على الأخرى وتسب الأخرى بأنها غير شريفة ، فتستشيط تلك الأخرى غضباً وكأنها سمعت غير الحقيقة .. متناسيات جميعاً أنهن بائعات هوى .. وأنهن يعملن في بيت للدعارة .. وأننا نراهن جميعاً ......... عاهرات.

هناك 49 تعليقًا:

micheal mohsen يقول...

أحييك لنشر هذا البوست لاني كنت مستني جدا أعرف رأييك في هذا الموضوع
لك فائق احترامي و بصراحة الواحد مش لاقي حاجة يقولها بعد اللي انت كتبتة

غير معرف يقول...

حتي ولو كان فخا اعد لها باحكام من قبل النظام الواطى فلاول مرةمنذ 26سنة يفعل هذا النظام شيئا يفرحنى ولو بالقليل , فاخضاع هالة سرحان لمقصلة النظام يفرحنى ولو ان النظام فعل ذلك بغير قصد(لا ليفرحنى ) هو واذنابه من الاعلاميين واصحاب الاقلام الصدأة ولكن من الممكن ان تكون كل هذه الهالة ماهى الا هالة لالهاءالشعب المسكين عن قضاياه الاساسية ,وما هى الاحلقةمن حلقات النظام الفارغة مثلها مثل حلقة التوربيني مثل حلقة حلاق المعادى ولكن ماحدث لهالة سرحان افرحنى لانى دعوت الله كثيرا ان ارى فى هذه العجوز الشمطاء يوما ,, وان شاء الله يتحقق
وعموما كالعادة انت متفوق علينا بمقالاتك لك الشكر والتحية
*******
تحياتى
فارس

Nikolay Gogol يقول...

مع احترامى لابن بهية

طبعا احنا عندنا حاجات فى حياتناسواء على الصعيد الشخصى او العام اهم من الموضوع بتاع هالة و الحكاية مش المفروض تاخد كل الاهتمام ده لكن

اولا بما ان مفيش حاجة بتتحل حاليا فى بلدنا و مفيش تقدم حاليا الا تبعا لمشيئة الحج مبارك و كل واحد مستنى التانى يتحرك و انا شخصيا مستنى الاخوان المسلمين يتحركوا علشان اتحرك وراهم
فمن الجيد حاليا كل فترة ان الواحد يشوف مسرحية من هذا النوع خاصة لو كانت لشخصية الواحد بيحتقرها زى هالة سرحان
تسلية و شماتة يعنى لغاية مايقضى الله امرا كان مفعولا
ثانيا الواحد حاطط فى دماغه المصريين الغلابة اللى فى الخليج و اللى حاجات زى حلقات هالة سرحان دى بتيجى اول ماتيجى على دماغهم همه, حته الاطفال يعنى البلد مليانة مصايب و حلقات هالة سرحان بتزود الهم على اللى هجوا من البلد
لما حد ييجى يقول لابنك مصر بلد الدعارة و مصر كذا و كذا

يعنى باختصار
انى مبسوط ان واحدة زى دى بيمثل بيها حاليا
يعنى على الأقل النظام بيحب يسلينا كل فترة بمسرحية تكسر حالة الاستقراااااااااااااااار اللى احنا فيها.

moodysalihamidzic يقول...

انا مش بحب هالة سرحان
بس ضد انى اقول عليها او ع البنات
انهم عاهرات
دى كلمة مش قليلة ابداً
وسمعة الناس اعلى وارقى اننا نتداولها بكلام زى ده بمنتهى البساطة كده

IBN BAHYA - إبــن بهيـــــــــــــة يقول...

micheal mohsen

أهلا يا عم الشباب
دايما سباق يا مايكل .. ربنا يخليك
ألف شكر ألف شكر على كلامك الطيب .. مين يشهد للعروسة بقى .. ربنا يكرمك
ألف شكر

أرق تحياتي

========================

fr_فارس

برضه عم الشباب
ربنا يكرمك ويحفظك على الكلام الجميل ده

وبعدين إيه حكاية متفوق علينا .. يا عم الحاج إحنا كلنا إخوة واللي بيقدر على حاجه بيقولها لإخوانه الباقيين ولا إيه ؟

أرق تحياتي

===========================

Nikolay Gogol

والله كلامك صح .. بس الدول العربية فيها ألعن وأضل مما لدينا في مصر وكلهم يعرفون هذا غيرش بس إحنا غسيلنا دايما على الحبل زي ما حضرتك شايف
وده في حد ذاته كويس لو بحسن نسه مش حاجه تانيه

يعني لما نناقش بلاوينا بموضوعية وبدون خدش للحياء وفي بحث مؤدب عن الحل نكون حلوين لكن لما ممذيعة تسأل البنت وكنتي بتستمتعي وانتي نايمه مع الزبون ؟ دي تبقى سفاله بجد مش إعلام ولا بحث عن حلول
ولا إيه؟

أرق تحياتي

عموما ربك يعدلها

أرق تحياتي

===========================

moodysalihamidzic

يا عم الحاج حلمك شويه

أرجو إعادة قراءة الموضوع مرة تانيه يمكن تغير رأيك

لا أنا قلت على المذيعه ولا البنات عاهرات يا عمونا

أنا باتكلم بصيغة تهكمية على المثقفين والإعلام وما وصفتش أي من البنات ولا المذيعه بكده

روق
روق
واقرا الموضوع من تاني مع كباية شاي كده وراح تدعيلي بإذن الله

أرق تحياتي لشخصك الكريم

لكم جميعا أرق وأطيب تحية

غير معرف يقول...

شكرا على ردك الجميل وعلى مجهودك واحنا كلنا اخوان ..مصريين !!!!!
تحياتى

عباس العبد يقول...

شوف يا ابن عمى
انا كتبت تدوينة من فترة اسمها
بنات ليل و كده و بتاع
قلت فيها الى انته بتقوله
فعلا
احنا بنعانى
من مشاكل فى خلايا المخ و الفص الامامى
دولة تسعى الى الانهيار الكامل بسرعة
مريعة
و انا قلت زى ما حضرتك قلت
خناقة عاهرات
و قلت كمان
الوحشة تبليك و الى فيها تجيبه فيك
عنوان التدوينة
http://charkawy.blogspot.com/2007/02/blog-post_18.html
احب انك تشرفنى و تقول رأيك

غير معرف يقول...

السلام عليكم و رحمة الله و بركاته

كيف الحال يا اصدقائى و احبائى الكرام..لكم اشتقت الي سماع ارائكم المبينة...لقد جئت فقط لالقاء السلام علي استاذنا الكبير ابن بهية المحترم و جميع من شاركوه الراي ...قرأت الموضوع و لا اجد اي اضافة اقولها الا الدعاء لبهية الغالية ان يخلصها المولي عز و جل و هو القادر علي كل سيء من كل من يتربص بها و باولادها و ان ينجيها مما هي و هم فيه..و هو علي كل سيء قدير

غير معرف يقول...

الاخ الغالى ابن بهية اسمح لى بمداخلة بسيطة لم نعد نستطيع فى ظل العولمة و مفهوم العصر الحالى ان العالم اصبح قرية صغيرةلا نعيش فى عالم واقعى مرير المذيعة المذكورة تعانى من كراهية غالبية الشعب المصرى بسبب اسلوبها الفج كما نوهت سيادتكم ولكن اسمح لى يا اخى الكريم اليس هذا هو واقع الحياة فى مصر الاسلوب الفج والجنس هى السمة الغالبة فى حياتنا بسبب الجهل الذى نعيش فيه اصبحنا بعيدين عن المولى سبحانه وتعالى فسلط علينا من لا يرحمنا واصبح العهر والعرى هى سمة وصفة فينا اخى من اسبوعين كنت فى زيارة لدوله اوروبية وصدقنى يا اخى وجدت اسلاما بلا مسلمين وفى مصر عندما عدت وجدت مسلمين بلا اسلام اصبحنا شعب بلا هوية فهذا هو حالنا
وادعو الله ان يهدينا ويقومنا وحاليا لا املك سوى الدعاء لانه سلاحى اما الكفاح والجهاد فى سبيل التغيير والتحرير فاعتقد ان جيلى فقد هذه السمة وسوف تلاحاقنا لعنات من بعدنا على ما نحن فيه
اخيرا لك كل احترامى
رئيس تحرير
mego-mego@blogspot.com

واحد من الناس يقول...

كلام رائع
لكن انا لا اعلم ما هي مصادرك في قصة جود نيوز و روتانا
فالرجاء التوضيح

على فكره انا كتبت بوست عن موضوع هاله سرحان بعنوان الأعلام الهادم
ياريت اعرف رأيك

IBN BAHYA - إبــن بهيـــــــــــــة يقول...

fr_فارس
أنا الذي أشكرك على المتابعة ومن قبلها على الزيارة والاهتمام

أرق تحياتي

=========================

عباس العبد

أشكر زيارتك الطيبة
وسأزور مدونتك الكريمة اليوم بعون الله

أرق تحياتي

=========================

عنتر مش لاقي سيفه

ألف شكر على زيارتك الكريمة والتعليق
وكمان شكر كبير على ذوقك وكرم أخلاقك .. أستاذ مين يا عم الله يرضى عليك .. احنا يا دوب غلابه .. لكن ده من كرم أخلاقك بس .. أشكرك

أرق تحياتي


=========================

رئيس تحرير

يا راجل روق شويه بس

مهما أظلمت سيأتي النور بإذن الله .. وكل ما زاد الظلام كل ما الفجر اقترب وأوشك على البزوغ

تفائل خيرا عما قريب بعون الله

أرق تحياتي



=========================


واحد من الناس

أهلا أخي الكريم

لا أدري عن أي مصادر تسأل أخي الكريم؟

هل عن موضوع عرض روتانا بواسطة مندوبتهم هالة سرحان على عادل إمام العمل في جود نيوز ؟
هذا لا يحتاج إلى مصادر .. كل الدنيا تعرف هذا وتم نشره منذ أشهر في كل وسائل الإعلام تقريبا

أما عن مصادر أخرى تتحديث أخي الكريم؟

سأعطيك نبذة من باب الاحتياط برضه

هالة زوجة عماد الدين أديب سابقا وهي مطلقة منه منذ سنوات وتحاول محاربته إعلاميا .. هذه أمور معروفة ولا تحتاج إلى أدلة لأن الزواج كا شرعيا وأخباره تملأ الدنيا وكذلك الطلاق
وعماد أديب هو من وضع قدمها على أول سلمه أو لنقل في بير السلم كمان

طيب وإيه يعني؟

عماد أديب شريك لسعوديين في أوربت وهو صاحب شركة جود نيوز
طيب؟
وهو من المقربين جدا للجنة وكوسات إبن الموكوس
وقريب من أمن فخفخامة جلالة الواطي مبارك وليس أمن دولتنا
طيب؟
وعلى علاقات معروفه بندل الرئيس والرئيس ذات نفسه

طيب؟

والمحور هي مملوكة لصديقه المحاسب البسيط سابقا حسن راتب صاحب برضه سما العريش
واللي كان محاسب غلبان في شركه في السعودية قبل ما يرجع رأس مالعه قطعة أرض صغيره في شارع فيصل ومن وراها اتفتح له كنز علي بابا
لما حط إيده في إيد اللي ما يتشموش واشتغلوا في السياحه والقرى السياحية والذي منه

المهم دي كلها برتيته في قلب بعضها زي ما حضرتك شايف

وكله تحت الخيمه الكبيره بتاعة المحروس بتاع لجنة الوكوسات

طبعا الكلام ده مش محتاج مصادر لإثباته لأنه لا يحتاج إلى إثبات .. لأنه أمر واقع كما ترى

عموما تحت أمرك فيما تريد

أرق تحياتي



أرق تحياتي

IBN BAHYA - إبــن بهيـــــــــــــة يقول...

أخي الكريم
واحد من الناس

أرجو تحديد المصدر الذي أردت الاستفسار عنه كي أستطيع توفيره لك لأنني بصراحه تهت منك شويه ومش عارف أي مصدر تريد؟

أرجو التوضيح وسأكون عند طلبك بإذن الله

تقبل تحياتي

ibn nasser - ابن ناصر يقول...

اه والله كلامك صح معركه في بيت العاهرات ,,,لكن انا بكره هاله سرحان كره ,,لكن هما بيقرصو لها ودانها بس مش أكتر

Hannoda يقول...

أعتقد ان الهجوم عليها أخدد أكبر من حجمه الطبيعي لإن فيه ناس كتير معبيين منها وأنا واحده منهم

بقالها قد ايه بتقدم هزل و مسخرة مستفزة

أما عن المصالح فأنا اتوقعها
وما فيش حاجة اسمها مصر أكبر من ان الموضوع ده يمس سمعتها زي مابيقولوا

أنا هنا في قطر اتأزمت جدا من تعليقات جنسيات كتير على اللي شافوه وحسيت بالشماتة كمان

IBN BAHYA - إبــن بهيـــــــــــــة يقول...

أشكر لكم جميعا الزيارة إخواني الأعزاء

ibn nasser- ابن ناصر

الله يحفظك .. كلامك صحيح جداً لأننها حاليا نمر بمرحلة القرص واللسع لكل من يعارض أو يعترض أو يتعرض لجيمي وعصاباته

ولو ركزنا شويه راح نلاقي تلاته أضرتهم هالة هم عيال أعمال من اللي شغالين مع جيمي وطليقها السابق على رأسهم ولم يستطع هو عمل تلك الفضيحة في قناته الأوربت فاستعان بصديق
وهو حسن راتب العامل ضمن برتيتة عيال الأعمال بتاعة جيمي

ويوجد طرف أضرت به هالة هو فخفخامة جلالته وكام حلقه وقعوا منها عن غير قصد قبل سنه تقريبا وكان ضيوفها دمهم تقيل أوي على النظام من عينة الولد المشاغب وائل الإبراشي والسجين طلعت السادات

ثم زودت الطينه بله وراحت مخبطه في وزارة الداخليه في حلقة البنات اللائي قلن أنهن يحتمين بالشرطة من البلطجية

يعني كلهم اتلموا عشان يضربوها ضربة عيل واحد ليتفرق دمها بين الزبائل

يا بقى
ربك يسلط أبدان على أبدان


أرق تحياتي

==============================

Hannoda

كلامك صحيح
والله وبالذات قطر بوصفها دويلة صغيرونه ومعظم سكانها من البدو الذين أكثرهم سعوديين وهم يستغربون تلك الأمور وكأن القيامة قامت مع أنها عادية كأي بلد آخر وأقل كثيرا من العادي لأن مصر بها خمسة وسبعين مليون بني آدم يعني 300 مرة ضعف قطر .. ولو كان عندنا 1 % ضاربين يعني ثلاثة أرباع مليون مقابل 250 سخص قطري ..

أنا هنا بأعطيكي ردود للي يتغابى عليكي .. لأن كثيرا من الجهلاء يتغابون ويسوقون علينا كمصريين بعضا من الهبل على الأبلسه ولو دورنا نلاقي العكس

يعني كل واحد خايب أو واحده خايبه عندهم يقابله عندنا 300 بالتمام والكمال ونبقى زي بعضينا .. طبعا ده مش موجود بما يعني أن مصر أفضل لو أخذنا في الاعتبار عدد السكان الهائل جدا الذي يقارب مثل عدد العرب ملمومين كلهم مع بعض .. طبعا الكلام ده يحدث بين الجهلاء .. لكن الإخوة العرب الفهمانين لا يتطرقون مطلقا إلى مثل هذه الأمور نهائيا

أرق تحياتي

Nikolay Gogol يقول...

على ذكر المصادر يابن بهية
انت ليه بتقول دايما عن مبارك انه ماسونى؟؟؟؟؟
انا افهم ان الراجل ممكن يبيع ابوه علشان الكرسى و انه مش مهتم باى شى لا دور خارجى و لا البلد بتتباع لمين و لا اى شى غير انه يبقى الرئيس و ابنه يبقى الوريث.
و حته الواحد يعتقد ان كبيره قوى على مبارك انه يبقى ينتمى لاى فكر او جماعة
خاصة لو كانت زى الماسونية

و بخلاف كده كلامك عن عماد اديب و عن الراجل بتاع سما العريش و غيرهم الحقيقة فهمنى يعنى ايه ان فيه اسر و عائلات هى اللى تملك كل شئ فى مصر و انها اللى بتحكم و معنى دائرة المصالح
و تحياتى ليك و لكل الناس

Unknown يقول...
أزال المؤلف هذا التعليق.
Unknown يقول...

عودة حميدة ان شاء الله يا ابن بهية
موضوع هالة سرحان بعد اذن سيادتك تسمحلي، انا شايف ان الموضوع ليه ابعاد تانية خالصة شوف حضرتك امتي اثير الموضوع وماذا فعل النظام الخايب من اعمال صبيانية غير مسؤولة
اولا اتخذ الحكومة قرار بالقبض علي بعض قيادات الاخوان المسلمين ثانيا التحفظ علي رؤوس اموال اكثر من 28 من رجال الاعمال الذيين ينتمون الى الاخان المسلمين الامر الذي ادي بدوره الى انهيار البورصة المصرية بشكل مفاجأ للجميع بسبب سحب بعض اصحاب الاسهم المنتميين الى الاخوان المسلمين لاكثر من اربعة مليار جنيه من البورصة في اقل من اسبوع بالاضافة الى خوف المستثمرين العرب من الهبوط العجيب للبورصةبالاضافة الى دخول الكبار وشالوا الاسهم ببلاش وبعدين بعد فترة هنلاقي الاخت هالة زفتان طالعة في قناة تانية غير روتانا او في روتانا نفسها مبتفرقش معاهاوكأن شئ لم يكن ويقال ان قناة او تي في عارضة عليها تشتغل معها بميلغ 50 الف دولار شهريا بدلاً من اربعين الف اللى بتخدهم من روتانا
. يعني يا استاذي الحكومة بتلهي الناس علشان تعمل اللى عايزها ... قال يعني بتختشي علي دمها... ديه بقه اسمها دعارة فكرية وسلم لي علي سفاح المعادي

غير معرف يقول...

العزيز ابن الغالية بهية

هالة سرحان شخصية لا تستحق ان يكتب عنها الشرفاء لسبب واحد
أنها مجرد هالة من الهواء والكل يعرف ذلك
حتى بعد متابعة اول تلات حلقات لها فى اى قناة فضائية
معروف انهم يستعينون بها فقط فى اى قناة لمجرد رفع اسهم تلك القناة بحواراتها المخالفة لكل ما هو سائد فى اى مجتمع تكون هى فيه
فهى تمشى دائما عكس التيار
يعنى لو حطيتها فى قناة استربتيز فى مجتمع غربى حتلاقيها بتزعق بنفس الوتيرة لعودة الفضيلة والحفاظ عليها ومحاربة الاستربتيز ومحاربة تشليح الحريم ومحاربة شذوذ المجتمع

وكله للفت الانتباه للقناة ليس الا
هالة ما هى الا هالة من الضوضاء والضحك المرتفع والصوت العالى فقط
ماهى الا هالة من الأباحة والوقاحة فى حضرة علماء كبار لا تستطيع مجاراتهم فتنقذ نفسها بالتطاول عليهم

وتجدها تجارى العاهرات من ضيوفها
لأنهم من نفس المستوى
فتجدها تتفوق عليهم بصوباع رجلها الصغير بلا منافس

هالة ما هى الا اداة لرفع اسهم القنوات البايرة وبس
ولما تتم المراد منها
على أول تراش تلاقيها

انما بقا لو حتراعى الأبعاد الاجتماعية او الأخلاقية أو شرف المهنة؟؟
يبقا هالة حتبقا سلعة بايرة زيها زى الدكتورة درية شرف الدين
وزى منى الحسينى
وزى خديجة بن قنة

تحياتى
وازيك كدة؟

غير معرف يقول...

اشكرك على هذه المعلومات فقد كفيت و اوفيت
وااسف عن جهلى بهذه المعلومات حيث اني غير متابع لما يحدث تحت منضدة الأعلام
وشكرا مره اخرى

IBN BAHYA - إبــن بهيـــــــــــــة يقول...

أشكركم جميعا على الزيارة والتعليق وكله .. لكم مني أرق وأجمل تحية وتقدير وإعجاب بعقول ولاد بهيه النبهاء اللي مات شفتش زيهم في كل البلاد اللي زرتها .. الكلام ده والله العظيم ما هو من باب التعصب الأعمى لإخواني وأخواتي .. لأ والله .. دي حقيقه واللي بيقابل جنسيات وأعراق تانيه كتير حيعرف تمام المعرفه بأن أولاد بهيه ما فيش زيهم ..

وده وحده والله اللي مخلينا عندنا أمل .. لأن الولاد دول (ولاد بهيه) لو توفرت لهم الفرص الحقيقية للإبداع والتعبير الصادق عن ذواتهم بعيدا عن الاضطهاد والقهر راح تشوف منهم العجب ..
مصر لو مسكها ولادها راح يخلوها درة الكون في خمس سنين زي محمد علي ما خلاها درة التاج العثماني في خمس سنين وهو مستلمها خرابه زي تمام ما هنستلمها من مبارك الواطي ..

يالا ربك يعدلها ...


Nikolay Gogol

طبعا كلامك صحيح تماماً من ناحية أن العتل مبارك الواطي لا تمكنه قواه العقلية الضعيفة من العضوية في النوادي الماسونية .. بس ده برضه يمكن من باب التضليل أو التمويه .. لو تفتكر من يوم ما جه الخايب الواطي إلى الحكم وهو يتبع معنا أسلوباً موصوفا له بدقة شديدة .. في البداية كان متجهماً عبوساً كريهاً على حقيقته .. لكن وصفت له أساليب أخرى للتعامل مع الشعب المصري اللطيف إبن النكته فراح الواطي يحشر أو يحشرون له في خطاباته بعض النكات والقفشات من عينة ((خفوا بالليل شويه)) التي قالها في إحدى خطبه مطالبا الناس بتحديد النسل ..

العملية محسوبة ومرسومه مش متروكه للصدفه إطلاقاً ..

وأما عن المصادر فهي كثيرة ، أهمها إحدى المجلات الأوروبية التي نشرت عن ذلك منذ أعوام ، موقع العربي الناصري الذي نشر منذ عامين وثائق مأخوذة من دار المحفوظات البريطانية وهي عبارة عن شهادة جنسية لسوزان مبارك تفيد بجنسيتها البريطانية لأنها مولودة لأب مصري وأم بريطانية يهودية ، وشهادات ميلاد جيمي وإيلي وهي أسماء أبناء الرئيس جمال وعلاء (هذا من دار المحفوظات البريطانية) .. وتلك لاوثائق كانت لدى أحد الصحفيين المحترمين ممن اهتموا بشأن ذلك الواطي الذي وضعوه في كرسي الرئاسة في بلدنا ..

أهم المصادر هو ما خرج عن المحفل الماسوني اللندني وهو أكبر وأقدم محفل ماسوني في العالم والذي جاء فيه أنهم حققوا في مصر في عهد ولاية مبارك الواطي ما لم يحققوه في سنين طويلة ، حيث تمكنوا من توطين عدد كبير جدا من المحافل الماسونية تحت أسماء مستعارة بالطبع (جمعيات العمل التطوعي والمدني) وفي عهد مبارك الواطي تمكنوا من افتتاح عدد كبير جدا من نوادي الروتاري والليونز لم يكن لهم أن يفتتحوها من قبل حتى في عهد حبيبهم السابق السادات.

هذه بعض وثائقي حتى اللحظة وما خفي كان أفظع بالطبع .. لكن هذا يكفيني حاليا لكي أطلق عليه لقب ماسوني .. وهو يكفينا للتيقن من ماسونيته .. يكفي ذلك التسريب للوثيقة التي خرجت من محفل لندن لتقول أنهم كسبوا في عهد مبارك من انتشار نوادي الروتاري والليونز ما لم يكسبوه في سنوات طويلة مضت ..

للاستزادة من المصادر ، أرجو التوجه إلى محركات البحث والبحث عن جذور الماسونية بالعربية والإنجليزية وسترى العجب عن زعماء العرب الأشاوس .. عموماً أنا تحت أمرك في أي معلومة أو مصدر ..

أرق تحياتي

===========================

Comment deleted

شكرا على الزيارة .. بس ليه حرمتنا من معرفة رأيك ومسحت التعليق ؟

برضه لك تحياتي


===========================
مذكرات حاحا مصر

الله يحفظك ويبارك فيك .. وألف شكر على السؤال ...
كلامك صحيح وأنا معك في هذا وهو جزء مما ذكرته سابقاً كما رأيت .. المشكلة أن الناس البسطاء يتبعون فقط ما يلقى إليهم في الإعلام .. والزن على الودان أمر من السحر كما تعلم .. ودول شوية حثالة بيزنوا في ودان الناس زن يودي في ستين داهيه والله ..

المسألة أكل عيش وبس كما ترى وكله بياكل عيش على قفانا .. هالة سرحان ده شغلها مهما اختلفنا معاها وأنا أكدت عشرميت مرة بأنني أمقتها مقتا كثيرا ولا أبالي بأمثالها .. لكن لو جئت للحقيقة والواقع الكئيب لوجدت أنه تؤدي عملها كالراقصة أو حتى من استضافتهن في برنامجها .. إن الداعرات يرين أنهن يقمن بعملهن غير مباليات برأينا نحن في هذا العمل .. صح ولا لأ ؟

المسألة أننا مطالبون بتبادل الأدوار لنتمكن من معرفة كيف يفكر الآخر .. المهم أنا لا يهمني في الأمر غير المثقفين الضالين الذين ضلوا طريقهم نحو قيادة الأمة وراحوا ينقادون ويلهثون خلف مصالحهم الضيقة مهما كان ذلك ضارا بأمتهم وشعوبهم التي وثقت فيهم .. هذا هو الأمر الذي يشقينا أكثر من غيره

أرق تحياتي

=====================

شــهــروزة

كلامك صحيح يا بنت الغالية بهيه .. ما اختلفناش خالص .. أنا كتبت لأنتقد من يكتبون ويتكلمون وووو كما ترين .. هذا هو ما تضيق به أنفسنا حقيقة .. يعني لما الكتاب والمثقفين يتنحرروا ويشمروا عن سواعدهم ويتلموا في برامج هبله عشان يمصمصوا في عظام هالة سرحان .. لأ وإيه يدخلوا في نقاشات حاميه مع البنات ((اللي مش عارفين هن بتوع ليل ولا نهار)) ده اسمه كلام فارغ زي ما حضرتك شايفه .. يجيلك نفر طول بعرض بقلم أطول من كوبري أكتوبر ويسأل البنت (وانتي ازاي تقبلي كده) ويدخل معاها في حوارات وحواديت وكلام .. بالله ده نقدر نقول عنه مثقف ولا يستحق يقود نهضة هذه الأمة ؟ وهو يعرف يقينا كما قلت بأن الجنازة حارة والميت .. بعيد عن السامعين كلب ..

العك ده هو اللي مضايقني جدا ومخليني مش عارف أسكت عليه عشان كده بس كتبت ضد الجميع وليس بقصد الحديث عن تلك الهالة الفارغة كما تفضلتي .. سيبك .. ازيك انتي بقى ؟


أرق تحياتي

=============================

واحد من الناس


الله يحفظك .. أنا من يشكرك على اهتمامك ومتابعتك للموضوع .. بتحسسني بأن ولاد بهيه مصحصحين وسينهضون قريبا جدا بإذن الله

أرق تحياتي

أرق أرق أرق تحياتي لكم جميعا

Unknown يقول...

مداخلة بسيطة
تاكيدا لتعليقي السابق انظر ماذا حدث في البروصة المصرية اليوم الاربعاء الموافق 28/2 من انهيار شديد متزامن مع رفض المحكمة رفع الحظر عن اموال 29 من جماعة الاخوان المسلمين
وشكرا

IBN BAHYA - إبــن بهيـــــــــــــة يقول...

مذكرات حاحا مصر

أنا لم أعترض على ما ذكرته حضرتك في موضوع البورصة وتأثير اعتقالات الإخوان
بل على العكس أنا أعلم بأنه سيكون للتضييق على الإخوان تأثير كبير وخطير على كل البلد وليس البورصة وحدها

من هذه الناحية نحن متفقان

أرق تحياتي

غير معرف يقول...
أزال المؤلف هذا التعليق.
غير معرف يقول...

انا بطبيعة الحال يا عزيزى لم أقصد قلمك الذى يكتب
ولكن أقلام من يدعون الشرف والثقافة والتقدمية والانفتاحية على العالم المتحضر
برامج كاملة أعدت لمثل هذا الحدث الجلل
وكأن مشاكل أمة العرب والمسلمين اقتصرت على طرف عباءة الهالة الخرقاء
العجوز الشمطاء ذات الاتنين وستين ربيعا

وكأن مشاكل مصر كلها من القاع للقمة ارتبطت بتلك الهالة
علشان كدة قلت لك
لا تستحق أن يكتب عنها اقلام الشرفاء

وطبعا وجهة نظرك واضحة جدا فى الموضوع يا عزيزى
دة انت ابن بهية الغالية

انا كويسة الحمد لله طول ما انتم بخير و بهية بتحاول لسة تبقا بخير يا طيب

غير معرف يقول...

الحرية للمواطن المصري الشريف
" محمد خلف "
http://alayasser.maktoobblog.com/?post=228478

IBN BAHYA - إبــن بهيـــــــــــــة يقول...

انا بطبيعة الحال يا عزيزى لم أقصد قلمك الذى يكتب
ولكن أقلام من يدعون الشرف والثقافة والتقدمية والانفتاحية على العالم المتحضر
برامج كاملة أعدت لمثل هذا الحدث الجلل
وكأن مشاكل أمة العرب والمسلمين اقتصرت على طرف عباءة الهالة الخرقاء
العجوز الشمطاء ذات الاتنين وستين ربيعا

وكأن مشاكل مصر كلها من القاع للقمة ارتبطت بتلك الهالة
علشان كدة قلت لك
لا تستحق أن يكتب عنها اقلام الشرفاء

وطبعا وجهة نظرك واضحة جدا فى الموضوع يا عزيزى
دة انت ابن بهية الغالية

انا كويسة الحمد لله طول ما انتم بخير و بهية بتحاول لسة تبقا بخير يا طيب


شـــهروزة

أهلا يا أحلى بنات بهيه .. مش بنت بهيه .. لازم تكون حلوة ودماغها أحلى دماغ زي كل ولاد وبنات بهيه الغاليين ولاد الغالية أم الدنيا .. ربنا يخليكي يا شهروزة .. أن طبعا فاهم كلامك .. ومقدر موقفك اللي هو موقفي برضه ممن تسمينها الشمطاء وكلامي كله كما تعلمين كان موجها لهؤلاء المحترمين الأفاضل الذين شمروا عن سواعدهم ودخلوا المعركة وهات يا ردح لهالة وبنات هالة .. وكله في الهجايص طبعا ..

هم دول المثقفين اللي مستنيين منهم نهضه ؟ يادي النيله ؟ اردم اردم .. دول شوية مرتزقه .. وشاعر أكره .. عارفه شاعر أكره دي بتاعت عمنا الفاجومي ؟ ناس معبيينها بالزنبرك وبيشغلوها حسب الوقت والتاريخ والجهة وتنزل إسهال كلام وتعليقات وكتابات هايفه لا تودي ولا تجيب .. ولو ركزنا حبتين هنلاقي الأفندية القفوات دول هم اللي برضه بينشطوا في الهجوم على كل تيار وطني حقيقي كالإخوان أو اليسار الحقيقي الأصيل وكل القوى الوطنية الحقيقية .. يعني الحدوته مجرد زنبرك متعبي عشان يرغي زي ما عبوه ..

ده اللي واضح أوي في بلادنا الأيام دي ..
خلاصة الكلام هي أن تكميم الأفواه هو هو بس الأيام دي الأفواه بتكمم بالجاتوه والشيكولاته ولو ما تكممتش يبقى برضه السجن موجود .. طيب والله التكميم زمان كان أشرف وأحلى وألطف .. لأن التكميم بكبس الأفواه بالجاتوه خلى الأمور تدخل في بعضها والناس تتوه أكتر ما هي تايهه .. بس خلاص
أرق تحياتي

==========================

طيف بدر

الحرية للمواطن الشريف " محمد خلف "

الحرية لكل مواطن شريف

والسجن والجلد والإعدام رميا بالبصاق للجبناء والحرامية وسمسارة الوطن وعلى رأسهم مبارك الواطي وعصاباته

أرق تحياتي

ibn nasser - ابن ناصر يقول...

علي فكره المحكمه حكمت في قضية خيرت الشاطر واكتر من عشرين واحد من الاخوان بالتحفظ علي أملاكهم وده الشق المدني لسه العسكري ,, ماهو المحاكمه عسكريه

كراكيب عادل يقول...

ممكن طرح الموضوع بدون تلك الكلمات

يعني مفيش داعي نكتب............ ووووو


هنفهم برضو

تحياتي

غير معرف يقول...

زهرة الرمان
فى الزمان الردىء ينتشر العفن ويجد لة سوقا رائجة بين المطبلين والمزمرين ودعاة الحرية الكاذبة كما يزعمون وتلك المرأة المنحلة عار بنات اهلها وشعبها لا تستحق الا ان تقتل بالقباقيب كما ماتت شجرة الدر من قبل
الانسانة الفاضلة هى التى تحمل هموم شعبها المطحون بالفقر والبطالة والمرض وتعمل على اعانة المحتاج وتحث على الخير وتقول كلمة معروف
اما ان تتبنى موضوع الساقطات والعاهرات وزبالة مجتمعنا فهى تنتمى الى هؤلاء وفكرها اقرب الى فكرهم وخطر جدا نشر تلك الافكار بين البنات الصغار من جهاز اعلام زى بريق يقربنهن ويزين لهم الحرام
انها امرأة تدعوا الى الانحلال وتجاهر بكلمات يخجل وكيل نيابة رجل ان يحاور تلك الساقطات بها كما فعلت تلك المرأة الشيطانة
واخيرا لايبقى الا الكلمة الطيبة التى يقصد بها وجة اللة

ذو النون المصري يقول...

ياعم ابن بهيه
نحن الان و منذ زمن نحيا حالة فصام في اخلاقنا و سياساتنا و في كل شيء
الناس فصاميين و الدعاه الي الله فصاميين و السياسيين بالمثل و اكثر من الكل
تنتظر ايه من الناس دي
لازم ينتهزوا الفرص للقضاء علي اي موطن يؤلمهم او يفترض انه ممكن يؤلمهم
هما خططوا لاهماد انفاس بلدنا
لكن فيه نقطه مهمه ان احنا فينا عيوب كثيره جعلتنا مطيه للناس دي
و دي حاجه لازم احنا نعترف بيها
ضهرنا عريض زياده عن اللزوم و ده بيخليهم يركبونا مرتاحين
............اسلوبك و تحليلك اسعدني جدا

-_- يقول...

بالنسبة لموضوع هالة سرحان فنظرا لشهرتها و سمعتها خصوصا لقب دكتورة الذي تحمله و الحمد لله فقط عرفنا تماما نوعية الدكتوراه الذي تحمله

IBN BAHYA - إبــن بهيـــــــــــــة يقول...

شكرا لكم جميعا إخواني وأخواتي الأعزاء

ابن ناصر

ربنا يتولانا ويتولاهم .. ماذا تنتظر من مبارك الواطي غير ذلك ؟
أبناء البلد تصادر أملاكهم وتخرب بيوتهم وتغلق شركاتهم وتشرد آلاف الأسر التي تعمل معهم أو لديهم .. مش مشكلة .. يغوروا كلهم .. تغور البلد كلها .. المهم فخفخامة جلالة الواطي يعيش ويتهنى هو و العصابات التابعة له وللندل الصغير ولي عهد الجمهورية ..

تقبل تحياتي

=====================


كراكيب عادل

شكرا لزيارتك الكريمة .. لكني لم أفهم ما هي الكلمات التي تعنيها أخي الكريم ؟ ممكن توضيح؟

تقبل تحياتي


=====================


زهرة الرمان

كلامك صحيح جدا .. هالة سرحان دي مفروغ من أمرها وانتهينا .. الهم والباقي على الأفندية اللي نازلين سن في لسانهم اللي عايز قطعه وشغالين حرت في الغيط اللي يشاورلهم عليه سيدهم وولي نعمتهم بتاع السلطه .. يعني دوسوا هنا يا مثقفين يدوسوا هنا المثقفين .. وطبا طظين تلاته في البلد زي ما حضراتكم شايفين .. يالا ربنا يستر بقى

أرق تحياتي


=====================


ذو النون المصري

كلامك برضه صحيح .. نعمل إيه بقى نصيبنا كده .. لكن الضهر العريض ده (تشبيه جميل أوي) لازم راح يجيله يوم ويتهز شويه ولا تيجي رياح وترمي اللي راكب على الأرض وتنكسر رقبته بإذن الله .. دوام الحال من المحال .. وقريبا جدا سيأتي ربك بالفرج ..

تقبل تحياتي

=====================



Sharm

كلامك معقول جدا .. بس على فكره مش هي المهمة في الموضوع .. المهم الأفندية اللي بيبيعوا أقلامهم ولسانهم وقاعدين يشحتوا قدام الفضائيات والصحف .. عاملين الثقافة والفكر سبوبة .. هي ممكن تكون سبوبة بس بشرف .. لكن الواضح إنهم واخدينها سبوبة بيع شرف إن صح التعبير ، برغم قسوته فهي الحقيقة مع الأسف ..

أرق تحياتي

FATMA يقول...

انا دايما رأيي في هالة سرحان انها مذيعة وشها مكشوف و مع ذلك حسيت فعلا ان الفضائيات عملت زي المثل اللي بيقول العجل وقع هاتو السكينة
تناولك للموضوع كان بطريقة شيقة جدا و بموضوعية تستحق رفع القبعة
chapeau

IBN BAHYA - إبــن بهيـــــــــــــة يقول...

توتة توتة

شكرا على الزيارة والتعليق

كلامك صحيح جدا

أكرر شكري على كلامك الجميل الذي لا أستحقه

أرق تحياتي

غير معرف يقول...

دوت كله سفاله وقله ادب من هاله سرحان ولاالاعلام الفاسد وعلي العموم هو وجود كده برده في مصر حجات زي كده ياريت تشرفني علي مدونتي

غير معرف يقول...

على فكرة انا متابع لردودك وتعليقاتك مع باقى الاخوة واتفقت الاراء على كثرة الاقلام الفاسدة التى تحمد وتسبح باسم النظام ولكن فى الوقت الحالى اصبح من الصعب التمييز بين الاقلام الفاسدة (شماشرجية النظام ) وبين الاقلام المحترمة التى اصبحت قليلة جدا جدا جدا, فمنهم من يتستر بالشرف وينادى بالحرية والمهلبية , اعاننا الله واياكم على تمييزهم
تحياتى ليك
فارس ,,

IBN BAHYA - إبــن بهيـــــــــــــة يقول...

fares

طبعا كلامك صحيح كالجميع .. عموما رايح على مدونتك الكريمة حالا بإذن الله

أرق تحياتي

========================

fr_فارس

كلامك والله صحيح جدا مع الأسف الشديد ، فقد اختلط الحابل بالنابل لأسباب مادية بحتة تتعلق بلقمة العيش والطمع والجشع فبات كل قلم يتطلع ((وهو من حقه ولكن ليس على مصلحة الوطن)) لتوفير حياة كريمة لأطفاله ثم حياة أكرم ثم أكرم ثم أكرم ونسيت تلك الأقلام في خضم بحثها عن لقمة الجاتوه والشيكولاته أنها تضيع بلدا وأمة .. إنه زمن مبارك الواطي الذي بات فيه لكل شيء ثمن حتى الوطن .. ربك يرحمنا

أرق تحياتي

shahrzad_storry teller يقول...

بالنسبة لأسلوبك شيق جدا
وبالنسبه للموضوع : اكيد ماتستاهلش ان الواحد يفكرفيها
بس هي تستاهل اكتر من كده بكتير
ده بس شد ودن من الناس اللي كانوا بيطبطبوا عليها عشان الكل يعرف بقة اخرته فين
وعلىرأي صلاح جاهين
قالو السياسة مهلكة بشكل عام
وبحورها يابني خشنةمش ريش نعام
غوص فيها تلقي الغرقانين كلهم
شايلين غنايم... والخفيف اللي عام
تحياتي على البوست الجامد ده ويا ريت تنورني على البوست بتاعي

sydalany-وش مكرمش يقول...

بص يا باشا هو الموضوع ما يستاهلش
بس اللي يستاهل إنها ما إتنشتش حكم
بالعقل كده لو دول بنات ليل فعلا كان المفروض يتم إستجواب معد البرنامج جابهم إزاي عشان يقبضوا على كام شبكة دعارة
و لو ما كانوش بنات ليل فالموضوع فبركة المقصود منها إثارة الرأي العام ...و مصر على كلمة إثارة

و ببساطة لو واحدة إتفرجت على الحلقة و شافت البنات دول بيتكلموا بالثقة دي إذا لو إتزنقت في قرشين حتعرف إن الدعارة مش صعبة للدرجادي و مربحة حتى الكلام عنها مربح بدليل الربعميت جنيه اللي كل واحدة خدتها

و أيا كانت الحقيقة فهي طلعت زي الشعرة من العجين أو حتطلع و ببساطة الناس بتحب الكلام في التابوهات عشان كده ناس ياما إتفجوا على الحلقة رغم إن أغلبهم كان وشه محمر لكن إحمرار الوش كان أكتره لذة بالكلام في الممنوع
و اللي مش عاجبه الحلقة و شاف فيها مشكلة كمل فرجة للآخر ليه

و يعني جت على الست هالة
ما هي أغلب أفلام السينما المصرية من أيام الأبيض و الإسود لحد دلوقتي بتدور حولين الخيانة الزوجية أو واحد ماشي مع واحدة أو إبن البواب ماشي مع بت الأمير ولو سألت أي حد عربي حيقولك إن مصر كلها دعارة و تجار مخدرات و عصابات و بلطجية لإن ده ببساطة اللي بيشوفه في الأفلام...يبقى الست هالة مش محتاجة توحي بحاجة هي أساسا معروفة و بتتأكد من أول ما يركب التاكسي جنب المطار و يسأل عن مكان يلاقي فيه حريم

لكن لو سألتني الناس محتاجة كل يومين حلقة زي دي مش عشان يتم إلهاءهم ...لا ...عشان ينسوا هموم لقمة العيش و يلاقوا حاجة يثوروا عشانها و يضحكوا عليها و يسخروا من تفاصيلها

و لو ما فيش حاجة حصلت خلال شهر حتلاقي الناس نفسها تنبش قبر أي موضوع قديم و يطلعوا جثته و يقعدوا جنبه يندبوا

إيه ده
أنا كتبت ياما أوي
ده دليل إني واحد من الناس اللي بيستمتعوا بالكلام في موضوع تافه ما يستاهلش
:0(

:0))

غير معرف يقول...

فلاح مصرى
ابن بهية
اخبرنى احد الاصدقاء وهو طبيب فاضل ومتزوج من سيدة فاضلة ذات خلق ودين ومحتشمة وكان فى سفرية الى احدى الدول العربية فى مؤتمر علمى مدعوان الية وتعرف فى احد اللقاءات على مواطن من تلك البلد ودعاة الى بيتة لتناول الغذاء يعنى الرجل عزمة على غداء ونتيجة لعدم الاختلاط فى تلك البلد الرجال لوحدهم والحريم لوحدهم دخلت السيدة زوجتة الى الداخل لتتغدى مع زوجة ذلك الصديق المعرفة وجلست معها تتبادل الحديث وفجأة طلبت زوجة ذلك الرجل من السيدة المصرية الحاجة المحتشمة ان تقوم وترقص لهم شوية وتهز وسطها على واحدة ونصف فما كان من المصرية الا ان غادرت البيت فورا
امثال السيدة هالة واشباهها هم من يتركون انطباعا عند العرب ان سيداتنا راقصات وفتياتنا عاهرات ويقضون صباحهم ومسائهم فى معاقرة الخمر والرقص وفعل المنكرات كما يشاهدون فى افلام خميس فجلة وامثالة من مروجى الفن الهابط ان سمعة بلدنا لا يجب ان تلاك على شاشات التلفاز وبين تخيل مخرجين فاقدين للاهلية تحت مسمى الفن وحرية الابداع وكلام المسخرة الذى نسمعة
امثال تلك الساقطة هالة يجب ان يدخلوا السجون بتهمة تشوية سمعة مصر والعيب فى مصر
وان يخرج الشرفاء المعتقلون من الاخوان وايمن نور وطلعت السادات وغيرهم وغيرهم

IBN BAHYA - إبــن بهيـــــــــــــة يقول...

shahrzad_storry teller

أهلا وسهلا بيك .. ألف شكر على الزيارة الكريمة .. وأشكرك على إطرائك الذي لا أستحقه مطلقا .. ألف شكر .. وكلامك صحيح هي ما تستاهلش خالص وما كنتش والله العظيم راح أتكلم خالص خالص في الموضوع لأنه تافه أوي أوي أوي .. لكن اللي شفته في وسائل الإعلام والمثقفين الحلوين بتوعنا اللي بيجروا ورا المصاصه زي الأطفال (وطبعا المصاصة في إيد النظام) زهقونا وقرفونا في عيشتنا فقلت أخش فيهم كلهم شمال بقى لأني طهقت من الكل كليلة .. يعني الحكومة خايفه من الإخوان تروح مسلطه عليهم المثقف المسعور أو السعران اللي موجود منه ألفين نسخه بكل لون وتيار ومله وينزل تبهديل في الإخوان وخلاص عشان المعلوم طبعا .. زهقوا من أي جنس مخلوق .. هوب يسلطوا عليه المثقفين السعرانين دول ينهشوا لحم اللي جابوه وعظم جدوده كمان في الترب .. حاجه بجد بقت تقرف وتغيظ لأننا إحنا اللي بندفع التمن من قوت ولادنا للكروش دي عشان تكبر على قفانا ربنا يفرقعها قادر يا كريم ..

كلامك عن عمنا الغلي أبو الصلح (رحمه الله) فكرني بقصايد وكلام كتير وكبير لعمنا الفاجومي ربنا يطول عمره عن شاعر الأوكره ويعيش أهل بلدي (لو سمعتيها من عمنا الشيخ غمام عيسى الله يرحمه) .. راح أفكرك بكلمتين .. يعيش المثقف ف حي الزمالك .. وحي الزمالك سالك مسالك .. هاه افتكرتي مقهى ريش ؟

عموما ً سازور مدونتك الكريمة حالا بإذن الله
أرق تحياتي

IBN BAHYA - إبــن بهيـــــــــــــة يقول...

sydalany-وش مكرمش

بجد مش عارف أقولك إيه .. كلامك صحيح لدرجة تغيظ والله .. ربك يرحمنا .. طبعا إحنا ما نقدرش نقولهم في السينما خلوا بالكم ولا كلام من ده أحسن يرمونا بره البلد ويقولك متطرفين مع إننا ناصريين .. لكن ضرورات الفن تبيح محظورات الوطن ولو كانت العرض والشرف .. حلوة العبارة دي ؟ زمان قلتها في ندوة وكانوا هيضربوني لما سخرت من بعضهم .. طبعا راح يقولولك دول العرب هم اللي حمير وكلاب وما بيفهموش فن وعشان كده بيعتقدوا إن مصر كلها كده من الأفلام ..

طبعا كلام غير صحيح بالمرة .. لأننا إحنا في مصر اللي بقينا نفتكر ده قبل العرب من كتر العري والعك اللي بنشوفه على الشاشة .. يالا ما علينا .. الظاهر إنها لزوم ما يلزم العولمة يا سيدي الفاضل ، ولفظة العولمة كما ترى .. ربما جهابذة المثقفين تبعنا اعتبروها اشتقاق من العالمه .. مش عالمة في أي مجال تقني لا سامح الله ولكن في أصول تأجير الجسد لنظرات المحرومين .. هيصة

المسألة ببساطه إننا مش عايزين نعمل مسلمين ولا مسيحيين ولا يهود حتى عشان الكلام في الدين دلوقتي بقى مشكله توجب القتل سجناً أو ذبحاً أو تحفظا على البنطلون .. خلينا نقول نعمل زي الهنود والصينيين وأمريكا اللاتينية .. حتى بلاش الصين وأمريكا اللاتينية دي عشان ما ندخلش في جدل الماركسية وتأثير البوليتاريا على البطيخ لاقرع .. يعني قصدي نعمل زي الناس اللي عايزين يحافظوا على هويتهم وبس من تغول ماما أمريكا وعولمتها الماسونية دي .. بس كده .. صعب ده ؟

أرق تحياتي

IBN BAHYA - إبــن بهيـــــــــــــة يقول...

Anonymous

ياه يا عمونا دي حكاية مشهورة أوي أوي .. بس فيه حاجه غلط في الموضوع من أساسه وسوء فهم أصلا .. في بلاد الخليج (أغلبها) الرجال في ناحية والنساء في الناحية التانية لوحدهم .. أحد أصدقائي حصل معه موقف غريب زمان لما كان برضه مدعو عند أحد الأصدقاء.. المهم لديهم هناك عادة إنه لو عزم حد لازم يعزم الشارع كله معاه لأنه احتراما ليك بيدبحلك خروف وربما أكثر .. لدرجة أن صديقنا العزيز ظل ماسكها له ذله وفكره بيها لما جه مصر وعزمه وعزمني معاهم .. يومها سأل صديقنا المصري الأخ الخليجي ((هو انته جايب قرايبك يشهدوا إنك عزمتني ولا إيه ؟ طيب ورحمة أبويا لما تيجي مصر لأعزمك في الشارع عشان أمة لا إله إلا الله تتفرج عليك ))

المهم حكى لي صديقي أن الرجال يكونون في ناحيه والنساء في ناحيه أخرى بعيدة خالص وحكت له زوجته بعد انتهاء العزومة عن أنهم أناس مختلفون تماما كسيدات حين يكن لوحدهن بدون رجال .. يعني سواريهات وكده وواخدين راحتهم على الآخر وكمان بيقضوا الوقت في انبساط وفرفشة ورقص كمان لدرجة أنها كانت منزعجة جدا من الخجل والحيرة وجملة مشاعر غريبة انتابتها زي أي مصرية عادية تتعرض لموقف مشابه برغم أن واحدة لم تجرؤ على طلب مشاركة منها فيما يفعلن .. كن يكتفين فقط برأيها بوصفها مصرية خبيرة كما الاعتقاد السائد وهو إلى حد ما صحيح مش في الرقص لأ في أشياء أخرى كثيرة ، فزوجة صديقي هذه تنفق كثيرا من وقتها في نصح هؤلاء النسوة ببعض الموضات والطبخات ووصايا أخرى كثيرة ..

قصده الموضوع مش بالطريقة اللي إحنا بنفهمها كده وخلاص لأ .. القضية أن النساء يختلين بأنفسهن وهاتك يا عك ولخبطه طالما أنهن بعيدا عن أعين الرجال .. يعني ده عندهم عادي مش حاجه غريبة زي ما بنفتكر

طبعا كلامي هذا لا يبرر الموقف ذاته ولكنها قصة أردت الإشارة إليها للتوضيح بس مش أمكتر

المشكلة في العري ليست متعلقة بنظرة الإخوة العربان لمصر ولا كلام من ده خالص .. المشكلة في تأثير ذلك السفه الغريب في مصر ذاتها .. يعني حكاية رقص البنات في الأفراح مثلا ورقص العروسة .. لدرجة أنني سمعت ذات مرة أنه كان منتشرا منذ عدة سنوات موضة شراء ملابس رقص للعروسة ضمن جهازها ؟؟؟؟ بالله ده مش عيب أوي ؟؟؟

التأثير الخطير لذلك السفه هو ما يمكن أن يصب في المجتمع قبل أن نفكر كيف سيرانا الآخر .. يعني أنا مش هاممني بيتي يخرب وهاممني الناس هتقول عني إيه ؟ ده عامل زي اللي بيسموه بتاع سايب بيته عرضه للكلام الفارغ وهمه كله تكون سمعته بره البيت حلوه .. ده كلام مش منطقي أنا مش مهم عندي لا سمعه ولا نيله لو بيتي لا قدر الله اتلخبط كيانه وانقلب حاله كده .. ولا أنا غلط ؟ لو كلامي غلط سامحني لأني بانام والله من بدري بس آثرت الرد ..

أرق تحياتي

غير معرف يقول...

عزيزى ابن بهية السلام عليكم ورحمة الله وبركاته
وكمان صباح الخير ,,, بما اننا اتكلمنا على الاقلام الشريفة ( قليلة العدد ) والاقلام النجسة الفاسدة وشماشرجية النظام , يهمنى جدا اعرف رايك وبكل صراحة فى احد الاقلام الى كنت اظن (على حد علمى وعقلى وتفكيري )انه شريف , ياريت تفيدنى برايك عن مصطفى بكري ,, معلش ممكن يكون السؤال محرج -مش عارف _ بس والله يهمنى انى اعرف رايك فيه , الرجل ده مع مين بالضبط ...... فى انتظار ردك ولك تحياتى
فارس

IBN BAHYA - إبــن بهيـــــــــــــة يقول...

ياه يا عم فارس

كنت تظن أنه شريف ؟ هل تدري أنك تعبر عن رأيي أيضاً ؟ أنا برضه كنت أظن أنه شريف ولكن قبل سبع سنين بالتمام والكمال عندما انفصل عن ....... ولهف كام صحفي معاه وانشق وفتح دكان وسط البلد سماه الأسبوع واستغل علاقات معينه مع بعض أصحاب اموال من خارج مصر لغاية ما يقف على رجليه فحصل على هدايا وعطايا من صدام ومن حاكم قطر (دول تحديدا من أعلمهم) وكان واخد خط الهجوم على الحكومة لأنه بيقبض من بره والدخل مضمون وكله في اللابوريا .. مرة بتوع أمن فخفخامة جلالة الواطي قرروا يستعينوا بيه فراحوا داعيينه على غير موعد ولا يحزنون لمرافقة الواطي على نفس الطائرة في إحدى رحلاته خارج القطر المصري .. قال يعني بصفته رئيس تحرير والواطي كان واخد رؤساء التحرير معاه على الطيارة

وفي الطيارة جابوا مصطفى بكري يسلم على الرئيس (عفوا الواطي) فسلم عليه وهو مطأطأ والواطي جالس طبعا .. والواطي فتح موضوع كان الأمن كلمه عنه في السابق وهو تحويل مليون دولار لصحيفة الأسبوع من قطر وعلاقات جريدة الأسبوع ببرتيتة عضو مجلس الشعب عماد الجلده مدير مصانع صدام حسين في مصر والحكايات دي .. وطلب الواطي من مبارك أن ينضم درش لقافلة القرنية ومساحين الجوخ للواطي ونظامه وجحا أولى بلحم توره وراح نعوضك يا درش عن ملايين العراق وقطر .. إيه رأيك ؟

طبعا عمك درش ريل وأزبد وأرغى .. إحنا في الخدمة يا فندم .. بص الواطي للقذر اللي جنبه وقاله نسقوا مع مصطفى .. إحنا أولى بالأقلام المصرية من غيرنا .. دول ولادنا .. وسلمه مبارك الواطي للمسئوا الأمني الرفيع زي السمسمه وتم بذلك توقيع عقد الزواج على ظهر الطائرة بين الصحافي السمسار والسياسي القذر الواطي ، ومن يومها وهو واخد خط الهجوم على الحكومة من الوزير للغفير ويضرب فرامل عند اللي جاب أبو كل الحكومات مبارك الواطي ويلمع فيه كمان .. آدي درش يا سيدي

طبعا جريدته كبقية الصحف الصفراء في مصر مليانه صحفيين مجرمين من بتوع الابتزاز .. يعني ينعكشوا على المصايب في الشركات والهيئات ويا تدفع يا ننشر زي شركة الملاحات سنة 1997 لما حشروا فيها أحمد فؤاد نجم بدون داعي وبعد ما رئيس مجلس إدارتها دفع المعلوم تم وقف النشر الذي استمر فترة .. لأ وإيه تم نشر العكس بعد كام شهر .. يعني التشهير تحول إلى مديح بعد كام شهر بس بسبب دفع الأوبيج .

مع الأسف الشديد بلدنا خربها الواطي مبارك بكل الطرق الشيطانية لدرجة جعلت الخيانة وبيع الشرف والوطن والقلم والكرامة بملاليم هي السمة الغالبة لبلدنا في العهد المباركي الواطي ده .. في رأيي أن ذلك العفن الذي يعم بر مصر هو أهم وأخطر إنجازات عهد الواطي مبارك .. تحويل مصر إلى خرارة أو خرابة أو مصرف مجاري أو بالوعه مليئة بالصراصير التي ترتدي أفخر الثياب وتركب أفخر السيارات وهي صراصير قذرة تنتظرها النعال فور انتهاء ذلك العهد البغيض قريباً بإذن الله .. وبيد صغار ضباط الجيش مع الشعب بعون الله .. سترى عما قريب إن شاء الله ..

أي خدمه يا أبو الفوارس .. ولو تعرف حد قديم في الأسبوع اسأله حتعرف أكتر طبعاً

أرق تحياتي

غير معرف يقول...

بقي بعد الشرح الوافى الكافى المفصل ده عايزنى اسال حد , كفاية اننا بنثق فيك يا ولد بهية , مشكور على اهتامك وردك الكافي الشافى ,, اصل الحكايةياسيدى اننا سمعت مصطفى افندى بكري امبارح فى برنامج 90 دقيقة وعمال يشتم فىالحكومة ولازم تستقيل ولازم مش عارف ايه وانا عملت مظاهرةالنهاردة " بخصوص موضع الشريط اللى تم اذاعته فى اسرائيل عن تعذيب الاسري المصرين" وطالبت بطرد السفير الاسرائيلى من مصر وقعد يتكلم ويهرتل بكلام كتير وكبير ويشوط فى ناس كتير الا واحد مسمعتهوش شاط فى مبارك الواطى ولا اى حاجه خالص وكأن الحكومة دى مش حكومةمبارك ولا كان مبارك ده اللى مودى البلد فى داهية ,, عرفت واتاكد ساعتها ان له مساحة يتكلم فيها ويشتم فى الحكومة "سقف الحرية " بس السقف ده لحد الحكومة بس , وساعتها استعوضت ربنا فى البلد اللى معدش حد عارف مين حاميها ومين حراميها . عموما كويس انك وضحتلى الصورة ومشكور على وقتك تحياتى ليك ولكل قلم شريف فى بر مصر
فارس

غير معرف يقول...

أهلا أبو الفوارس

أشكرك على كلامك الطيب ..

شفت الكلام اللي قلته ليك ؟ أهو ابن بكري كده على طول من يوم ما مبارك عاتبه على المليون دولار اللي جايله من قطر فوق الطياره ووطى باس على إيد مبارك وهو شغال مع بتوع أمن مبارك وهاتك يا سب ولعن ونيله في الحكومه كلها إلا مبارك .. ده نوع من العك السياسي والدعارة الإعلامية التي نعيشها .. يعني كله محسوب .. زمان لما بدأ أحمد رجب ومصطفى حسين يعملوا فلاح كفر الهنادوه في أخبار اليوم والفهامه بتاعة أحمد رجب كانت لازم تروح بالفاكس تتراجع وترد تاني مع الموافقه على النشر .. دي حاجات بايخه وبقت خلاص قديمه ومفهومه والشباب دلوقتي بقى زي ما انته شايف بيعرف ويدور ويجيب المعلومة من بق الأسد الإعلامي الغربي ولا حوجه لجرايدهم الصفرا دي من عينة الأهرام والأخبار وكل الصحف الحكومية الصفراء ومعها بعض الصحف الحزبية والمستقلة زي الأسبوع بتاعة درش دي .. يالا بقى ربك يفكنا منهم ونخلص

أرق تحياتي

غير معرف يقول...

سليمان باشا غانم العمدة
يا شوية جعرات انا شايف كدة تلميحات من بعضكم عن السيد جمال مبارك ابن سيدنا ال اية مين هو دة وكلام ماسخ ال عملو لية وظيفة اسمها لجنة السياسات ولانة ابن الرئيس دايما صورة واخبارة ف الاعلام سابقة الكبار ... امال اية يا صايع منك لة انت عاوزين ابن سيدنا يباة واحد عادى وهو اللى تجرع الحكمة والعظمة والاهام واطلاق التحذيرات من بيت سيدنا بيت الرئاسة هىء هىء هىء طب اسالو اخوانا مومتاااذ القووط بتاع اخبار اليوم و اسامة سرايا و عبدالله كمالى بتاع روز اليوسف كدة واتعلموا منهم يا بقر ياكش فاكرين ان المظاهرات اللى موضبينها هتخوف سيدنا وابن سيدنا هىء هىء هىء دا احنا عندنا امن مركزى بالملاين يا بقر يعجنكم يا شوية هجايص فنجرية بق هىء هىء هىء ال تداول سلطة ال